Udako hamarretik bederatzi istripu saihes daitezke
Udan hainbat istripu gerta daitezke igerilekuan, hondartzan, beroaren eraginez… Horiek, baina, saihes daitezkeela azaldu du Errenteriako Gurutze Gorriak. Zehazki, hamar istriputatik bederatzi dira ekidin daitezkeenak. Horretarako hainbat prebentz...
Udan hainbat istripu gerta daitezke igerilekuan, hondartzan, beroaren eraginez… Horiek, baina, saihes daitezkeela azaldu du Errenteriako Gurutze Gorriak. Zehazki, hamar istriputatik bederatzi dira ekidin daitezkeenak.
Horretarako hainbat prebentzio neurri hartu behar dira, eta horien berri emango du Gurutze Gorriak Uda honetan maita ezazu zure burua kanpainaren bidez: “Prebentzioa funtsezkoa da era guztietako istripuak saihesteko, eta are gehiago udako oporretan, aisialdian, kanpoko ekintzetan, uretan edota eguzkipean”. Egoera horietan segurtasun eta osasunerako arriskuak “handitu” egiten direla azaldu du.
Horren guztiaren berri emateko egunotan kanpaina kalera aterako du, eta atzo eta gaur artean Errenteria-Oreretan, Lezo eta Oiartzunen ibiliko dira Gurutze Gorriko kideak.
Udan izaten diren ohiko istripuak eguzki erredurak, intsolazioak, ziztadak, digestio etendura edota itoaldiak direla zehaztu du Gurutze Gorriak, “eta biztanle guztiengan eragina izaten du”.
Espainiako Estatuan 70 eta 150 lagun artean hiltzen dira urtero itota, eta gehienak haurrak izaten dira, “askotan zainketa egokia ez izateagatik”.
25 urtetik beherako gazteengan, berriz, istripu ohikoenak muin traumatismoak izaten dira, eremu ezezagunetan buruz uretan sartzeak eraginda. “Erabateko baliogabetasuna izatearen hirugarren arrazoia da”, esan du.
Istripu ohikoenak animaliek eragindakoak izaten dira, osasun laguntzen %90, hain zuzen: marmokek, xabiroiek eta itsas trikuek eragindakoak.
