Oiartzungo herri bilgunearen bilera egingo dute gaur arratsaldean
Bihar, ostiralero bezala, elkarretaratzea egingo dute; preso eta iheslarien bazkarirako txartelak salgai daude Oiartzungo herri bilguneak bilera egingo du gaur arratsaldean Manuel Lekuona Bibliotekan. 19:30ean izango da. Berez, hilabeteroko bilera azke...
Bihar, ostiralero bezala, elkarretaratzea egingo dute; preso eta iheslarien bazkarirako txartelak salgai daude
Oiartzungo herri bilguneak bilera egingo du gaur arratsaldean Manuel Lekuona Bibliotekan. 19:30ean izango da. Berez, hilabeteroko bilera azken ostiralaren bezperan egiten dute, baina uztailean aurreratu egin dute, «xanistebanak direla eta, lehenagotik biltzea erabaki baikenuen».
Herritar guztiei bilerara azaltzeko deia egin diete. «Presoen salbuespenezko egoerekin bukatzea, eta iheslarien gaineko jazarpenarekin ere bukatzea errazagoa izango baita», esan dute herri bilgunekoek.
Bestalde, bihar, ostiralero bezala, elkarretaratzea egingo dutela gogorarazi dute. 20:00etan plazan elkartuko dira, eta ondoren Landetxera abiatuko dira han elkarretaratzea egiteko.
Azkenik, herri bilguneak jakinarazi du, xanistebanen barruan (abuztuaren 4an) preso eta iheslarien eskubideen aldeko herri bazkaria izango dela, eta txartelak dagoeneko salgai daudela, 12 euroan, ohiko tokietan.
