Eguzki: "Sanmarko Mankomunitateak birziklatzearen gainean hartutako azken erabakiak oso positiboak dira"
Oarsoaldeko Eguzki talde ekologista eta antinuklearrak "oso positiboki" baloratu ditu hondakinak birziklatzeko Sanmarko Mankomunitateak hartu dituen azken neurriak.
Oarsoaldeko Eguzki talde ekologista eta antinuklearrak “oso positiboki” baloratu ditu hondakinak birziklatzeko Sanmarko Mankomunitateak hartu dituen azken neurriak. Horien arabera, gutxienez hiri hondakinen %70a birziklatzea dute helburu, eta horretarako “beharrezko” bitartekoak, “atez atekoa, hain zuzen ere” ezarri dituela nabarmendu du Eguzkik. Horren harira, hainbat datu eskaini ditu talde ekologistak: “Oiartzunen birziklatze tasa %90etik hurbil dago eta Pasaia, Lezo eta Astigarragak sortzen dituzten hondakinen arazoari irtenbidea emateko bidea hartuko dute 2013an. Oreretak berriz, EAJ-PSOE eta PP koalizioa du aurrez aurre”.
Sanmarkoren erabakia “koherentea” izan dela, ingurumenaren babesa lehen lerroan jarri duela, eta garrantzi handiko ingurumen arazo bati irtenbidea bilatzeko “giltzarriak” aktibatu dituela nabarmendu du Eguzkik, “errauskailuaren aldeko lobbyak defendatzen zuenaren kontra. Azken horiek defendatzen duten errauskailu proiektuak ingurumena eta osasuna arriskuan jartzeaz gainera 500 miloi euro xahutzea zekarren”.
EAJk abiatutako Gipuzkoa Garbia kanpaina salatu du bestalde talde ekologistak, “gezurretan ari direlako. Errausketa eta birziklatzea kontrajarriak dira”. PSOEri berriz, iritzi publikoa “manipulatzeari” uzteko, eta “osasuna, ingurumena eta ekonomia gehien errespetatuko dituen bilketa sistema hautatzeko garaian” udalen autonomia errespetatzeko eskatu dio Eguzkik.
