Oinatz Mitxelena (Bildu): «Akordioetara iristeko gai garela erakutsi dugu urtebetean»
Bilduren udal taldeak urtebeteko lanaren balantzea egin zuen joan den ostiralean, Hazia elkartean komunikabideekin izandako hartuemanean. Bertan, koalizioak Irungo Udalean dituen bost ordezkariak izan ziren. Oinatz Mitxelena taldearen bozeramaileak “zerotik abiatu” zirela gogorarazi zuen: “Udalaren ezagutza ezatik hasi ginen, eta urtebetean asko ikasi dugu, funtzionamenduaz eta eguneroko jardunaz”. Mitxelenarentzat, Bilduren xedea beti akordioak bilatzea izan da, udal gobernuarekin zein oposizioarekin: “Arduraz jokatu dugu, eta akordioetara iristeko gaitasuna erakutsi dugu. Balorazioa oso positiboa egiten dugu, zerotik abiatu ginela kontuan izanda. Udalari begira aritu gara, baina erabakiak hartzerako orduan, baita herriari begira ere”. Jokin Melidak onartu zuen “batzuetan” udalgintzak irentsi dituela, “batez ere hasieran, berriak ginelako”. Hala ere, maiatzeko osoko bilkuran PPk ez beste alderdi guztiek onartu zuten presoen aldeko mozioa jarri zuen adibidetzat: “Azarotik maiatzera arte bilerak egin genituen, talde guztiekin elkartu ginen behin baino gehiagotan». Melidak ere Bilduren zeregina adostasunak bilatzea dela uste du: “Ados jartzeko gaitasuna erakutsi dugu. Dagoeneko beste alderdiek badakite nola egiten dugun lan: edozein gai mahai gainean jar dezakegu, eta zintzoki jokatuko dugu, akordioetara iristea delako gure asmoa”. Legealdiko lehen urteko akordio handienetako bat autobusena izan zen. Udal gobernuak abenduko plenora eraman zuen autobus linea berrien proposamena, baina oposizioko talde guztiek atzera bota zuten egitasmoa, eta [...]
Bilduren udal taldeak urtebeteko lanaren balantzea egin zuen joan den ostiralean, Hazia elkartean komunikabideekin izandako hartuemanean. Bertan, koalizioak Irungo Udalean dituen bost ordezkariak izan ziren. Oinatz Mitxelena taldearen bozeramaileak “zerotik abiatu” zirela gogorarazi zuen: “Udalaren ezagutza ezatik hasi ginen, eta urtebetean asko ikasi dugu, funtzionamenduaz eta eguneroko jardunaz”.
Mitxelenarentzat, Bilduren xedea beti akordioak bilatzea izan da, udal gobernuarekin zein oposizioarekin: “Arduraz jokatu dugu, eta akordioetara iristeko gaitasuna erakutsi dugu. Balorazioa oso positiboa egiten dugu, zerotik abiatu ginela kontuan izanda. Udalari begira aritu gara, baina erabakiak hartzerako orduan, baita herriari begira ere”.
Jokin Melidak onartu zuen “batzuetan” udalgintzak irentsi dituela, “batez ere hasieran, berriak ginelako”. Hala ere, maiatzeko osoko bilkuran PPk ez beste alderdi guztiek onartu zuten presoen aldeko mozioa jarri zuen adibidetzat: “Azarotik maiatzera arte bilerak egin genituen, talde guztiekin elkartu ginen behin baino gehiagotan». Melidak ere Bilduren zeregina adostasunak bilatzea dela uste du: “Ados jartzeko gaitasuna erakutsi dugu. Dagoeneko beste alderdiek badakite nola egiten dugun lan: edozein gai mahai gainean jar dezakegu, eta zintzoki jokatuko dugu, akordioetara iristea delako gure asmoa”.
Legealdiko lehen urteko akordio handienetako bat autobusena izan zen. Udal gobernuak abenduko plenora eraman zuen autobus linea berrien proposamena, baina oposizioko talde guztiek atzera bota zuten egitasmoa, eta alderdi guztien arteko bilerak egiten hasi ziren, akordio batera iritsi ziren arte. Bidean, zenbait eragile sozialek parte hartu zuten bileretan, eta haien eskakizunak aintzat hartu zituzten. Bilduren ustez, “azkenaldian politika parte hartzailea denen ahotan dago, baina guk eta gobernuak parte hartzeaz ulertzen duguna ez da gauza bera”.
Beste eredu baten beharra
Ostiraleko hitzorduan, aurrekontuez ere denbora luzez mintzatu ziren Bilduko kideak. “Bizi dugun egoera eredu batek eragin du, agortutako eredu batek. Aurreko urteko aurrekontuen osoko bilkuran alderdi denek aipatu zuten hori, baina udal gobernuan ez dugu ikusten borondaterik eredu aldaketarako. Aurrekontua zerotik berraztertzeaz mintzatzen dira, baina eredu berrira iristeko prozesu parte hartzaileak abiatzea ezinbestekoa da, eta aldaketak beldurra ematen die”, adierazi zuen Mitxelenak.
Eredua aldatze aldera, datozen hilabeteetan herri eragileekin harremanak estutuko dituztela aipatu zuen Olatz Agirrek: “Auzoetan egon behar dugu, auzo elkarteekin eta auzoetan dauden beste eragileekin, elkarlana sustatu eta harremanak sakonduz. Eredu politiko eta ekonomikoa ez dugu udaletik aldatuko, baina udaletik kanpo egin daiteke”.
