Murrizketen kontra elkarretaratzea egin dute goizean Lanbide aurrean
Elkarretaratzea egin dute murrizketak salatzeko
Elkarretaratzea egin dute "murrizketak" salatzeko
Hamarnaka lagunek egin dute bat ELA, LAB, ESK, ESTEE-EILAS, Hiru, EHNE, CGT-LKN eta CNT sindikatuek zein askotariko giza eragileek Espainiako Gobernuak onartu duen azken neurri sortaren aurka egiteko deitutako elkarretaratzearekin. Goizeko hamaiketan hasi dute protesta Errenterian Lanbideren egoitzaren aurrean, eta txistu eta lapiko hots artean salatu dituzte murrizketak. Besteak beste, “Murrizketa gutxiago, lanpostu gehiago”, “Espainiarekin hondamendia, independentzia” eta “Banketxeak lapurrak” oihukatu dituzte elkarretaratzean parte hartu dutenek.
Bildu direnen artean, Oarsoaldeko Langabeen Batzarreko kideak izan dira eta haien izenean, Rafa Lorentek, dei egin die herritarrei “kalera irten eta Mariano Rajoyk ezarri nahi dituen murrizketei ezetz esatera”. Murrizketak, “faxistak” direla esan du Lorentek eta hauen atzetik murrizketa gehiago helduko direla gaineratu du.
Horren harira, bihar arratsaldeko zazpietatik aurrera Herriko Enparantzan ELA eta LAB sindikatuek eta hainbat eragileek deitutako elkarretaratze zaratatsuan parte hartzeko deia ere luzatu diete herritarrei bi sindikatu horietako oarsoaldeko ordezkariek eta Oarsoaldeko Langabeen Batzarrak. amaitzeko, langabeen batzarrak hilaren 21ean, arratsaldeko seietan hasi eta ordubetez elkarretaratzea egingo duela jakinarazi du Espainako Gobernuaren azken neurri sortaren aurka: “Herriko Enparantzan egingo dugu elkarretaratzea, elizako eskileretan hain zuzen ere, eta bertan herritar guztiak parte hartzera animatu nahi ditugu”.
LAB sindikatuak bere aldetik, egun horretarako EH Bilduk Bilbon deitu duen manifestazioarekin bat egitera deitu ditu herritarrak.
