Ereintza eskubaloi taldeak abonatu kanpaina bat martxan jarriko du astelehenean
Zilarrezko Mailan jokatuko du datorren denboraldian Ereintza eskubaloi taldeak, eta horrek sortaraziko dizkion zailtasun ekonomikoei erantzuteko, abonatu kanpaina bat martxan jarriko du. Helburua 300 abonatu lortzea da. Egoera ekonomikoa kontuan izanda...
Zilarrezko Mailan jokatuko du datorren denboraldian Ereintza eskubaloi taldeak, eta horrek sortaraziko dizkion zailtasun ekonomikoei erantzuteko, abonatu kanpaina bat martxan jarriko du. Helburua 300 abonatu lortzea da.
Egoera ekonomikoa kontuan izanda, abonuak horren arabera finkatu dituzte. Abonu orokorra 40 eurokoa izango da, Ereintzako bazkideena 20 eurokoa, gazteena (12-18 urte) 20 eurokoa, eta familiako (gurasoak eta bi seme-alaba) 80 eurokoa. Herritar guztiei animatu diete abonatzera, datorren denboraldian “guztien bultzada” beharrezkoa izango dutela adierazi baitu Francisco Barros Ereintzako arduradunak.
Kanpaina astelehenean jarriko dute martxan lehen ogasunaren egoitza zegoen bulegoan (Madalen kalean), eta ostiralera arte egongo dira bertan. Madalenetan eta abuztuan atseden hartuko dute, eta irailean berriro han izango dira hiru astez.
Lokal hori udalak utzi dio Ereintzari, eta Julen Mendoza alkateak zein Jose Manuel Ferradas Udal Kirol Patronatuko presidenteak “igoeraren erantzukizuna udalaren zein udal kirol patronatuaren gain ez jartzea” eskertu diote Ereintzari.
Ereintzako jokalariek amateurrak izaten jarraituko dute, baina aurten kirolari profesionalak ere izango dituzte aurrez aurre, eta Asobal ligan egon diren taldeak. Hauek izango ditu kontrario: Puente Genil, Alcobendas, Barcelona, Teucro, Villaranda, Torrelavega, Adelma, Gijon Jovellanos, Barakaldo, Zarautz, eta Bidasoa.
