San Miguel Liga irabazteko hautagai serioa dela berretsi du Hondarribiak asteburuan
Lautik hiru. Hori da San Miguel Ligan Hondarribiak daraman bandera kopurua. Aurreko asteburuan erakutsi zuen ligarako hautagai sendoa zela, baina pasa denean berretsi du orain arteko talde indartsuena dila.
Larunbatean Portugaleten Kaiku gainditu zuten, bost segundoko aldeagatik. Txanda berean parte hartu zuten sestaoarrek eta hondarribiarrek, eta Urdaibairekin batera, azken txanpa polita eskaini zuten traineruek. Txanda horretan zegoen San Juan ere, eta azkenean laugarren bukatu zuen, irabazleengandik ia hamar segundora. San Pedro bosgarrena izan zen.
Herengungo EuskoLabel Banderako irabazlea ezagutzeko epaileen erabakia itxaron behar izan zen. Izan ere, berdeek hamasei ehuneneko aldea atera zioten Tirani. Ohorezko txandan ere gorriak ikusi behar izan zituzten hondarribiarrek Kaiku atzean uzteko. Oarsoaldeko traineruak, berriz, bezperan baino kaskarrago ibili ziren. San Juan zortzigarrena izan zen, eta San Pedro, berriz, bederatzigarrena.
Hondarribia da Ligako liderra, 45 punturekin. Kaikuk baino bi gehiago ditu. Euren atzetik hiruko taldetxo bat dago, bi punturen aldean. Hor dago San Juan, bosgarren, 34 punturekin. Postu bat beherago dago San Pedroko Libia ontzia.
San Juan, Euskotren Ligan
Neskek asteburuan hasi dute traineruen denboraldia. Gipuzkoako Ligarako puntuez gain, Euskotren Ligara nor sailkatzen zen erabaki dute asteburuan (baita bertako lehenengo puntuak banatu ere). Getaria-Tolosa sailkatuta zegoen jada (iazko garaileak izan zirelako), eta beste hirurak honakoak izan dira: Zumaia (larunbatean gailendu ziren), Galizia (herenegungo irabazleak) eta San Juan. Liga nagusian sartzeko faboritoak ziren hirurak, eta aurreikuspenak berretsi dituzte.
Hibaika eta Hondarribia kanpoan geratu dira, Oriorekin batera.
Bestalde, KAE1en, Hondarribia B sailkapen orokorreko hamargarren postuan dago, bi estropada lehiatu ondoren. Azken aurrekoa izan zen Elantxoben, eta bederatzigarren Santurtzin. Orio izan da jaun eta jabe orain arteko bi estropadetan.
KAE2ko lehia, berriz, Pasaiako badian jokatu zuten, herenegun. Bertan ere oriotarrak nagusi, B eskifaia, kasu horretan. Eurengandik bi segundo eskasera Trintxerpe gelditu zen. Sailkapen orokorreko berdinketa hautsi zen horrela. San Pedro B, berriz, bosgarrena izan zen estropadan. Laugarrenarekin berdinduta jarraitzen dute sailkapen orokorrean. Hibaika 11. izan zen, Luanco eta Santanderren aurretik.
