Umeentzako tailerrak antolatu ditu Oiasso Museoak udaran
Tailerrak Oiasso Museoan haurrentzat udaran
Oiasso Museoak tailer zikloa jarriko du martxan datorren larunbatean hasita sei eta hamabi urte arteko haurrentzat. Zazpi jarduerek osatzen dute tailer zikloa, eta antolatzaileek, Hondeatu dezagun jarduera nabarmendu dute: “Indusketa arkeologiko batean girotutako jarduera da hori eta parte hartzen duten haurrek arkeologoen lana zertan datzan zuzenean jakiterik izango dute”.
Tailerrak hil honetako eta abuztuko larunbatetan egingo dituzte 11:00etatik 14:00etara, hilaren 28rako prestatu dena izan ezik, egun osokoa izango baita azken hori. Programazioari dagokionean berriz, gynkana txikiak, erromatarren jolasak, eta erromatar munduan girotutako filma egingo dituzte, besteak beste parte hartzen duten haurrek.
Tailer bakoitzak hiru euro balio ditu, eta parte hartzeko izena eman beharko dute interesdunek 943 63 93 53 telefono zenbakira deituta, info-oiassomuseoa[abildua]irun.org helbidera mezua bidalita, edota Oiasso Museoaren harreratik pasata (Eskoleta kalea,1).
Lau jarduerako eskaintza berezia
Abuztuaren 21etik 24ra bitartean lau jarduerako eskaintza berezia antolatu du Oiasso Museoak. Horren arabera, museoaren ikustaldia, bidaia meatze-trenean eta arkeologia tailerreko bi jardunetan parte hartzeko aukera izango du eskaintza berezi horretan izena ematen duenak. Lau jarduerako eskaintzaren prezioa, hamar eurokoa da eta horretarakoe re izena eman beharko dute interesdunek. Informazio gehiagorako berriz, oiasso.com webgunean aurkitu daiteke.
Egitaraua:
- Hilaren 14a: Jolas Erromatarrak.
- Hilaren 21a: Goazen indusketara.
- Hilaren 28a: Dies Oiassonis.
- Abuztuaren 4a: Aintzinako asmatzaileak.
- Abuztuaren 11: Goazen indusketara.
- Abuztuaren 18a: Oiasso galduaren bila.
- Abuztuaren 25a: Erroma eta zinea.
