Aurten ere Zientzia Udalekuak egiten ari dira Arritxulon
Lehenengo txandako gaztetxoak bertan egongo dira etzira arte; beste bi talde pasatuko dira bertatik gero Hirugarren urtez jarraian, Zientzia Udalekuak antolatu ditu Elhuyar Fundazioak, Eusko Jaurlaritzako Hezkuntza, Unibertsitate eta Ikerketa Sailak la...
Lehenengo txandako gaztetxoak bertan egongo dira etzira arte; beste bi talde pasatuko dira bertatik gero
Hirugarren urtez jarraian, Zientzia Udalekuak antolatu ditu Elhuyar Fundazioak, Eusko Jaurlaritzako Hezkuntza, Unibertsitate eta Ikerketa Sailak lagunduta. Dagoeneko, lehenengo txandako gaztetxoak Arritxulon daude.
Etzira arte egongo dira bertan 1998. eta 1999. urteetan jaiotako 50 lagun. Datorren astean, urte berberetan jaiotako beste 50 gaztetxoren txanda izango da. Eta hilaren 16tik 22ra, helduenak, 1996. edo 1997. urteetan jaiotakoak.
Zientzia-udalekuetan, zientzia-ekintzak eta tailerrak uztartzen dituzte gazteek. Ekintza horiek gazteek ondo pasatzea eta zientziarekiko jakin-mina piztea dute helburu. Gainera, bi irteera ere egiten dituzte, «zientzia-esperimentuak eginez ikasteko, natura ezagutzeko ekintzekin gozatzeko, urarekin jolasteko eta beste hainbat abentura bizitzeko».
Beste helburuak
Gazteak zientziara hurbiltzea da Zientzia Udalekuen helburu nagusia, baina ez bakarra. Horrez gain, beste hainbat helburu ditu Elhuyarren ekimenak, hala nola: ongi pasatzea eta bizikidetza lantzea; zientziaz gozatzea; euskaraz bizitzea eta hezkidetza hezkuntza lantzea.
Udalekuetan dauden bitartean, gainera, gaztetxoek blog bat osatzen dute. Hala, gurasoei ez ezik, gainontzekoei ere egiten dituzten ekimenak kontatzen dizkiete. Interesa dutenek udalekuetako blog hori honako helbidean bisita dezakete: udalekuak.elhuyar.org/bloga.
