Hurrengo larunbateko Erromeria Egunak dantzan jarriko ditu errenteriarrak
Herri guztia dantzan ikusi nahi du hurrengo larunbatean, hilak 14, Ereintza dantza taldeak, Erromeria Eguna antolatu baitu hamalaugarrenez. Herri musika eta dantzari bultzada bat emateko asmoz jarri zuen martxan ekimen hori 1998an. Aurten ere “osagai guztiak” jarri ditu horretarako, eta orain jendeak erantzutea falta da. “Egitarau orekatua eta askotarikoa” prestatu dutela azaldu du Jon Maia Kukaiko eta Ereintzako kideak. Hala nola, Izer eta Alabier, Txorimaloak, TrikiSound eta Errenteria Musikaleko trikitilariak izango dira. Horiez gain, Alkarkide txaranga, Errenteriako gaiteroak, Oarsoaldeko txistulariak, Juan Mari Beltran eta Astiasaran anaien dultzaina eta trikiti doinuak eta Zubietako joaldunak. Musika bakarrik ez da izango, eta dantzan iaioa ez denak, Aiko dantza taldearekin ikasteko aukera izango du. Egitaraua finkatuta dagoen arren, bada ekimen bat zehaztuta ez datorrena. Iaz egin zuten lehen aldiz, eta aurten errepikatzeko asmoa dute: Oarsoaldeko txistulariak Donibanetik aterako dira txalupan, eta Oiartzun ibaitik Errenteria-Oreretaraino iritsiko dira txistu doinuak joz. Ordua itsasaldien arabera izango dela zehaztu du Ereintzak. Bazkarirako txartelak salgai Musika eta dantzaz aparte, nabarmendu beharrekoa da bazkaria. Koldo Mitxelena plazan (Esmalteria) egingo dute, eta sarrerak dagoeneko eros daitezke Ereintza elkartean, Arkaitza tabernan, Belen gozotegian eta Paki dietetik zentroan 15 euro (helduak) edo 10 euroren truke (haurrak). Hurrengo asteburuan bakarrik ez, honetan ere beste [...]
Herri guztia dantzan ikusi nahi du hurrengo larunbatean, hilak 14, Ereintza dantza taldeak, Erromeria Eguna antolatu baitu hamalaugarrenez. Herri musika eta dantzari bultzada bat emateko asmoz jarri zuen martxan ekimen hori 1998an. Aurten ere “osagai guztiak” jarri ditu horretarako, eta orain jendeak erantzutea falta da.
“Egitarau orekatua eta askotarikoa” prestatu dutela azaldu du Jon Maia Kukaiko eta Ereintzako kideak. Hala nola, Izer eta Alabier, Txorimaloak, TrikiSound eta Errenteria Musikaleko trikitilariak izango dira. Horiez gain, Alkarkide txaranga, Errenteriako gaiteroak, Oarsoaldeko txistulariak, Juan Mari Beltran eta Astiasaran anaien dultzaina eta trikiti doinuak eta Zubietako joaldunak. Musika bakarrik ez da izango, eta dantzan iaioa ez denak, Aiko dantza taldearekin ikasteko aukera izango du.
Egitaraua finkatuta dagoen arren, bada ekimen bat zehaztuta ez datorrena. Iaz egin zuten lehen aldiz, eta aurten errepikatzeko asmoa dute: Oarsoaldeko txistulariak Donibanetik aterako dira txalupan, eta Oiartzun ibaitik Errenteria-Oreretaraino iritsiko dira txistu doinuak joz. Ordua itsasaldien arabera izango dela zehaztu du Ereintzak.
Bazkarirako txartelak salgai
Musika eta dantzaz aparte, nabarmendu beharrekoa da bazkaria. Koldo Mitxelena plazan (Esmalteria) egingo dute, eta sarrerak dagoeneko eros daitezke Ereintza elkartean, Arkaitza tabernan, Belen gozotegian eta Paki dietetik zentroan 15 euro (helduak) edo 10 euroren truke (haurrak).
Hurrengo asteburuan bakarrik ez, honetan ere beste konpromiso bat izango du Ereintza dantza taldeak. Salouen (Herrialde Katalanak) egiten duten Euskal Herriaren Egunean parte hartuko du beste urte batez, eta Udal Txistulari Bandarekin batera bidaiatuko du. Urteak dira bertan parte hartzen duela Ereintzak.
Egitaraua
- 10:00. Diana, herriko kaleetan.
- 11:00. Hamaiketakoa, Koldo Mitxelena plazan (Esmalteria).
- 12:00. Kalez kale, musikariak eta dantzariak herriko kaleetan.
- 13:15. Neskatzen soka dantza, Zumardian.
- 14:30. Herri bazkaria, Esmalterian.
- 18:00. Erromeri nagusia, Zumardian eta herriko kaleetan.
- 19:00. Aiko taldea.
