Larunbateko manifestazioarekin bat
‘Birziklatzeari zentsurarik ez!’ lelopean, manifestazioan parte hartzeko deia egin die udalak herritarrei Larunbatean (hilak 7) manifestazioa izango da Donostian, Birziklatzeari zentsurarik ez! lelopean. Euskal Herria Bildu koalizioak antolatu du, eta 17:30ean aterako da Bulebarretik. Oiartzungo Udalak bat egin du manifestazioarekin, eta herritarrei parte hartzeko deia egin die. Udalak gogorarazi duenez, Gipuzkoako Foru Aldundiak Hondakin Plana aurkeztu berri du: «Errauste plantarik behar ez duen eta herriek askoz gehiago birziklatuko duten plana da, adituen laguntzarekin osatua». Horrek aurreko guztiak hobetu ditu, udalaren iritziz, eta aurrezten lagunduko du: «Orain arteko plangintza baino hobea izateaz gain —Europatik markatutako legeak betetzen ditu eta ingurumena zein herritarren osasuna zaintzen ditu—, merkeagoa ere bada». Gipuzkoako Foru Aldundiak, hondakinen gaia jorratu nahi izan du gainontzeko alderdiekin (EAJ, PP eta PSE-EErekin). «Baina hauek ez dute elkarrizketarako borondaterik erakutsi», udalak nabarmendu duenez, eta ez dute herritarren nahia errespetatu: «Gipuzkoarrek 2011ko maiatzeko udal hauteskundeetan argi eta garbi azaldu zuten zein den euren borondatea udaletan Gipuzkoako mapa aldatuz, beste gizarte eredu bat nahi dutela erakutsiz. Udal ordezkaritza hori kontuan hartuta osatu dira hondakinen mankomunitateak eta horien eskumena da hondakinen kudeaketa. Ondorioz, Batzar Nagusiek ezinbestean aintzat hartu beharko lituzkete horien iritzi eta erabakiak». Alduntzini babesa Bestalde, udaleko Gobernu Taldeak Juan Carlos Alduntzin Ingurumen [...]
‘Birziklatzeari zentsurarik ez!’ lelopean, manifestazioan parte hartzeko deia egin die udalak herritarrei
Larunbatean (hilak 7) manifestazioa izango da Donostian, Birziklatzeari zentsurarik ez! lelopean. Euskal Herria Bildu koalizioak antolatu du, eta 17:30ean aterako da Bulebarretik. Oiartzungo Udalak bat egin du manifestazioarekin, eta herritarrei parte hartzeko deia egin die.
Udalak gogorarazi duenez, Gipuzkoako Foru Aldundiak Hondakin Plana aurkeztu berri du: «Errauste plantarik behar ez duen eta herriek askoz gehiago birziklatuko duten plana da, adituen laguntzarekin osatua».
Horrek aurreko guztiak hobetu ditu, udalaren iritziz, eta aurrezten lagunduko du: «Orain arteko plangintza baino hobea izateaz gain —Europatik markatutako legeak betetzen ditu eta ingurumena zein herritarren osasuna zaintzen ditu—, merkeagoa ere bada».
Gipuzkoako Foru Aldundiak, hondakinen gaia jorratu nahi izan du gainontzeko alderdiekin (EAJ, PP eta PSE-EErekin). «Baina hauek ez dute elkarrizketarako borondaterik erakutsi», udalak nabarmendu duenez, eta ez dute herritarren nahia errespetatu: «Gipuzkoarrek 2011ko maiatzeko udal hauteskundeetan argi eta garbi azaldu zuten zein den euren borondatea udaletan Gipuzkoako mapa aldatuz, beste gizarte eredu bat nahi dutela erakutsiz. Udal ordezkaritza hori kontuan hartuta osatu dira hondakinen mankomunitateak eta horien eskumena da hondakinen kudeaketa. Ondorioz, Batzar Nagusiek ezinbestean aintzat hartu beharko lituzkete horien iritzi eta erabakiak».
Alduntzini babesa
Bestalde, udaleko Gobernu Taldeak Juan Carlos Alduntzin Ingurumen diputatuari babesa adierazi dio, «bere lana betetzeko ardura hartu duen diputatu baten kontra zentsura mozioa aurkeztea onartezina baita, eta berak birziklatu, berrerabili eta hondakinak gutxitzeko hasitako bidearekin bat egiten dugulako». Eta gogorarazi du Oiartzunek «aspaldi» erabaki zuela ez zuela errausketarik nahi, «eta herrian sortzen ziren hondakin guztiak birziklatzen saiatuko zela».
Horretarako, atez ateko bilketa martxan jarri zen herrian duela bi urte baino gehiago (2010eko maiatzaren 23an) eta emaitzak «begi bistakoak» dira, udalak nabarmendu duenez: «%30 birziklatzetik %80tik gora birziklatzera pasatu ginen hilabete gutxitan, eta maila horietan mantentzen dugu herriko birziklatze tasa ordutik».
