Irati Tobar presoa aske geratu da, bermea ordainduta
Irati Tobar euskal presoa aske utzi dute gaur, bermea ordainduta. Iazko martxoaren 30ean atxilotu zuten portugaletearra, Hendaian bizi zelarik. Berarekin batera Endika Perez askatu dute. Biak ala biak Frantziako poliziak atxilotu zituen iazko martxoan,...
Irati Tobar euskal presoa aske utzi dute gaur, bermea ordainduta. Iazko martxoaren 30ean atxilotu zuten portugaletearra, Hendaian bizi zelarik. Berarekin batera Endika Perez askatu dute. Biak ala biak Frantziako poliziak atxilotu zituen iazko martxoan, Espainiako Auzitegi Nazionalaren euroagindu bati erantzunez.
Dagoeneko kalean dira Segikoak izateagatik iaz atxilotu zituzten zortzi gazteak. Tobar eta Perez baino lehen Beñat Lizeaga, Jazint Ramirez, Aitziber Plazaola, Xalbador Ramirez, Aiala Zaldibar eta Bergoi Madernaz aske geratu ziren. Atxilotuak izan ziren garaian Ipar Euskal Herrian bizi ziren zortzi gazteak; Espainiako Auzitegi Nazionaletik haien kontrako euroagindu eskaera egin zuten, eta Paueko epaileak gazteak atxilotzeko agindua eman zuen. Euroagindu prozeduraren kontra itxialdia hasi zuten Intzuran (Nafarroa Behera), eta protesta utzi eta gero atxilotu zituzten, eta ondoren espainiaratu.
Hendaian babestu zuten
Irati Tobar izan zen atxilotu zuten azkena; Hendaian hainbat alderdietako hautetsiak, elkarte eta taldetako ordezkariak eta herritar soilak mobilizatu ziren gazte portugaletearra babesteko. Tobarrek bi astez baraualdia egin zuen Intzura auzoko egoitza batean, Iker Elizalde eta Xabi Hirigoien Hendaiako eta Beskoitzeko hautetsi abertzalekin batera. Itxialdia amaitzerakoan elkarretaratze handia egin zuten Errepublika plazan.
Martxoaren 30ean atxilotu zuten Tobar, Donibane Lohizunen, Lan Bulegora zihoanean. Ondoren espainiaratu zuten. Hamabost hilabete egon da preso.
