Astebururako motorrak berotzen
Gaur sanmartzialetako bigarren astebururako motorrak berotzen hasiko dira. Izan ere, kantineren aurkezpena egingo dute arratsaldean. Alarde Parekidea 20:00etan aterako da Urdanibia plazatik, 20:15ean Junkal plazan aurkezpena egiteko. Beranduago, 23:00etan, Alarde Tradizionalekoak irtengo dira Alberto Anguera plazatik, Zabaltza plazan bukatzeko. Gaur alardearen motorra berotzen hasiko bada ere, atzo irundarrak zein bisitariak ederki berotu ziren, egin zuen sargoriarekin. Atzo arratsaldean gazteen txanda izan zen, jaialdia egin baitzuten Urdanibia plazan. Graffittiak, tailerrak, dantza, musika… isobaren esku ez dagoen ezer ez zen falta izan. Iluntzean kontzertu batek hartu zion lekukoa, Granujas a Todo Ritmo taldea oholtza gainera igo baitzen. Gaur iluntzean eszenatoki hori Kataluniako bi taldek beteko dute. 22:45ean Bongo Botrako taldea ariko da —Todos los días sale el sol abestiaren egilea—. Txibiak eskatu ondoren, La Pegatina taldekoen txanda izango da. Bi gonbidatu berezi izango dituzte, gainera: Xabier Solano (Esne Beltza) eta Fermin Muguruza. Kontzertuaren ondoren ez da parrandarik faltako, eta La Pegatinaren abestiko Mari Carmenen semearekin aurkitzeko aukera izango du batek baino gehiagok, after-hour-ean. Bestelako musika eskaintza gogoko dutenek, izango dute nora joan: San Juan plazan Casting orkestra ariko da, eta Manuel Aznar enbaxadorearen kalean, berriz, camp dantzaldia egongo da, Dunboako Auzo Elkarteak antolatuta. Horrez gain, egun osoan zehar ez da ekitaldirik faltako. [...]
Gaur sanmartzialetako bigarren astebururako motorrak berotzen hasiko dira. Izan ere, kantineren aurkezpena egingo dute arratsaldean. Alarde Parekidea 20:00etan aterako da Urdanibia plazatik, 20:15ean Junkal plazan aurkezpena egiteko. Beranduago, 23:00etan, Alarde Tradizionalekoak irtengo dira Alberto Anguera plazatik, Zabaltza plazan bukatzeko.
Gaur alardearen motorra berotzen hasiko bada ere, atzo irundarrak zein bisitariak ederki berotu ziren, egin zuen sargoriarekin. Atzo arratsaldean gazteen txanda izan zen, jaialdia egin baitzuten Urdanibia plazan. Graffittiak, tailerrak, dantza, musika… isobaren esku ez dagoen ezer ez zen falta izan. Iluntzean kontzertu batek hartu zion lekukoa, Granujas a Todo Ritmo taldea oholtza gainera igo baitzen.
Gaur iluntzean eszenatoki hori Kataluniako bi taldek beteko dute. 22:45ean Bongo Botrako taldea ariko da —Todos los días sale el sol abestiaren egilea—. Txibiak eskatu ondoren, La Pegatina taldekoen txanda izango da. Bi gonbidatu berezi izango dituzte, gainera: Xabier Solano (Esne Beltza) eta Fermin Muguruza. Kontzertuaren ondoren ez da parrandarik faltako, eta La Pegatinaren abestiko Mari Carmenen semearekin aurkitzeko aukera izango du batek baino gehiagok, after-hour-ean.
Bestelako musika eskaintza gogoko dutenek, izango dute nora joan: San Juan plazan Casting orkestra ariko da, eta Manuel Aznar enbaxadorearen kalean, berriz, camp dantzaldia egongo da, Dunboako Auzo Elkarteak antolatuta.
Horrez gain, egun osoan zehar ez da ekitaldirik faltako. Egunero bezala, haurrentzako jolasak eta atrakzioak egongo dira goizez zein arratsaldez. San Migel auzoko plazara hurbildu besterik ez da beharko. 16:00etatik 21:00etara Genaro Etxeandia plazan ere jolasteko aukera izango dute.
19:00etatik aurrera, berriz, buruhandien aurrean korri egiteko aukera egongo da.
