Langaitz Ikastolan konponketak egin ditu udalak
Ikastolako eraikinetan konponketak egin dituela eta, esker ona adierazi dio Langaitzek Errenteriako Udalari. Ritxar Maritxalar zuzendariak eman du udalak egindako konponketen berri. Lan nagusia, LHko eraikineko patioa eta autopistaren artean “bab...
Ikastolako eraikinetan konponketak egin dituela eta, esker ona adierazi dio Langaitzek Errenteriako Udalari. Ritxar Maritxalar zuzendariak eman du udalak egindako konponketen berri. Lan nagusia, LHko eraikineko patioa eta autopistaren artean “babesgunea” sortzea izan dela azaldu du Maritxalarrek: “Urteetan, obretako hesiekin bananduta egon da, eta orain patioa eta autopistaren artean pareta hesitua eraiki dute”. Horrekin batera, ikasgelak margotu, paper ontziak eta tximinia berria jarri, geletan haurrentzako babesak jarri eta lorezaintza lanak egin dituzte LHko zein HHko eraikinetan.
Ikastolari begira, udal tekniko eta langileek egindako lanek “hobekuntza nabarmena” eragin dutela esan du Maritxalarrek, bestalde: “Zortzi urte dira konponketa horiek eskatzen hasi ginela eta ikasturte osoan lanean aritu dira udal langileak konponketa guztiak egiteko”. Lanak ikastolaren jaia ospatuko duten egunerako, ekainaren 16rako, amaituta egongo direla uste du Maritxalarrek. Ordurako egun osoko egitaraua antolatu dute Langaitz Ikastolan eta guraso eta haur guztiak animatu dituzte bertan parte hartzera.
