Aitor Hoyosek hartu du Patxi Hoyosen lekukoa BMW M3arekin
Semeak hartu du lekukoa. Patxi Hoyosek erretiroa hartu du lehiaketatik —nahiz eta talde teknikoan jarraitzen duen—, eta semea, Aitor Hoyos, hasi da Euskal Herriko Rally eta Rallysprint Txapelketan parte hartzen. Lehenengo denboraldia du, baina espe...
Semeak hartu du lekukoa. Patxi Hoyosek erretiroa hartu du lehiaketatik —nahiz eta talde teknikoan jarraitzen duen—, eta semea, Aitor Hoyos, hasi da Euskal Herriko Rally eta Rallysprint Txapelketan parte hartzen. Lehenengo denboraldia du, baina espero baino maila hobea ematen ari da, Hoyos aitaren arabera.
Martxoan hasi zen denboraldia, eta hiru rallysprint jokatu ditu Hoyos semeak Inhar Hoyos lehengusu eta kopilotua alboan duela. Guztietan, lehen hogei postuetan sailkatu dela jakinarazi du, eta hori garrantzitsutzat jo du taldeak, batik bat kontuan hartuta autoa ez duela ezagutzen eta oraindik ez dela erabat moldatu. Hain zuzen, aitak erabiltzen zuen auto berarekin dabil: BMW M3.
Aurretik hiru rallysprint eta beste hiru rally geratzen zaizkio. Hurrengoa, hain zuzen, Bizkaiko Balkoia izango da, hilaren 23an. Lehenengo rallya izango da pilotu gaztearentzat, eta “zaila” izango dela onartu du. Hala ere, denboraldian zehar erakutsitako maila mantentzen saiatuko dela adierazi du.
Arerio gogorrak ditu txapelketa horretan; Castro aita semeak, esaterako. Zortzi urte daramatzate elkarrekin, eta “sasoi onean” dabiltzala jakinarazi du. Bestea Iñaki Alberdi da, Espainiako txapelduna.
