Inkomunikatuta jarraitzen du Gurrutxagak, Baionako polizia etxean
Atzo arratsean 500 lagunek salatu zuten Gurru eta Aranbururen atxiloketa
Atzo arratsean 500 lagunek salatu zuten Gurru eta Aranbururen atxiloketa
Oroitz Gurrutxaga Gurru oreretarra eta Xabier Aranbururen atxiloketak salatzeko manifestazioa egin zuten atzo arratsaldean 500 lagunek. Herriko kaleak zeharkatu ostean, Herriko Enparantzan amaitu zen manifestazioa eta bertan, Oreretako ezker abertzaleak atxiloketen harira egindako oharra irakurri zuen. “ETAk gatazkaren ondorioen gainean Espainiako eta Frantziako Gobernuekin elkarrizketa zuzenak abiatzeko borondatea adierazi eta bi astera” egin dituztela atxiloketak salatu, eta jardun armatua behin betiko eteteko ETAren “erabaki historikoak” sortutako egoera berriari, Madrilek eta Parisek “betiko neurri errepresibo antzuekin” erantzun diotela gaineratu zuen.
Horren harira, euskal jendarte zabalak “normalkuntza politikoaren eta pakearen alde atzera bueltarik ez duten urratsak eta benetako borondatea” galdegin dituela gogorarazi zuen, eta horren aurrean bi estatuek “kontrako norabidea” hartu dutela “aukera historiko hau blokeatzeko” nabarmendu zuen ezker abertzaleak.
Horrenbestez, Frantziako eta Espainiako Estatuei “errepresio neurriak” alde batera uzteko galdegin zien ezker abertzaleak, eta bakearen eta aterabide demokratikoen aldeko “eragile proaktibo” bilakatzeko: “Zenbat eta errepresio handiagoa, orduan eta erantzun zabalagoa izango baitute. Aurrez aurre, bere eskubideak defendatzeko borrokatzeko prest dagoen herri oso bat dute, euskal jendartearen gehiengoa baikara gure eskubide guztien errespetua bermatuko duen agertoki berria aldarrikatzen dugunok”.
Bien bitartean, inkomunikatuta jarraitzen dute oraindik Gurruk eta Aranburuk Baionako polizia etxean. Azken berrien arabera lau egunez izango dituzte egoera horretan, epailearen aurrera eraman aurretik. Bestalde Espainiako Auziteki Nazionaleko Fiskaltzak Gurrutxagaren kontrako extradizioa eskaera egin zuen atzo bertan. Oreretarrak hiru auzi dituela Espainiako Estatuan esan zuten iturri horiek: Horietako bi “ETAko kide izateagatik” eta bestea kale borrokagatik.
