Clara Rangelen bikotekidea erruduntzat jo dute
Herenegun iluntzean eman zuen zinpeko epaimahaiak Clara Rangelen hilketaren gaineko epaia, eta Rangelen bikotekide izandakoa erruduntzat jo du. Horrez gain, bikotekide ohiari Rangelen semea eta bere anaia erasotzea leporatzen zioten, eta bi kasu horiet...
Herenegun iluntzean eman zuen zinpeko epaimahaiak Clara Rangelen hilketaren gaineko epaia, eta Rangelen bikotekide izandakoa erruduntzat jo du. Horrez gain, bikotekide ohiari Rangelen semea eta bere anaia erasotzea leporatzen zioten, eta bi kasu horietan homizidio saiakera delitu bat eta lesio delitu bat ere egotzi dizkio epaimahaiak.
Epaimahaiak aringarritzat jo du akusatuak “semea eta anaia erasotzerako garaian gaitasun mentala modu arinean baldintzatuta” edukitzea; “baina ez Rangel hil zuenean”. Larrigarritzat jo du hirurak senitartekoak izatea.
Epaimahaiak aho batez erabaki du akusatuak nahita hil nahi zuela Rangel, eta azpikeria egon zela. Rangelen semea ere hil nahi izatea egotzi diote, baina ez zuela lortu “bere nahiaren kontrako arrazoiengatik”. Horrenbestez, aho batez eskatu du indulturik ez emateko.
Epaileak hartu beharko du orain zigorraren gaineko erabakia. Fiskalak 33 urteko eta erdiko espetxe zigorra eskatu du, akusazio partikularrek 35 urtekoa, eta defentsak, berriz, 15 urtekoa; kontuan hartzeko eskatu du akusatuak barkamena eskatu izana.
2008ko abenduaren 29an hil zuten Rangel.