Bikain aritu dira eskualdeko dantzariak joan den asteburuan. Landare elkarteak antolatuta, Errenteria Hiria Kulturgunean egindako Haur Mailako Aurresku Txapelketako B saileko (12-15 urte) irabazlea Beñat Salegi errenteriarra izan zen. A Saileko txapela, berriz, Hernanira joan zen, Aitor Lasa dantzariaren eskutik.
Herenegun, bestalde, Soinu Zaharreko Euskadiko Neskatxena Txapelketaren finala jokatu zuten Legazpin, eta Nora Fraile eta Leire Amiano lezoarrak izan ziren irabazleak A sailean (7-11 urte) eta B sailean (12-15 urte), hurrenez hurren.
Maila txukuna Errenterian
Aurresku txapelketako bigarren eta hirugarren sailkatuak Iñaki Lasa donostiarra eta Iker Belintxon lezoarra izan ziren A sailean, eta Aritz Olarte oiartzurra eta Aimar Odiozola ibartarra, B sailean. Aurresku txapelketako finalera heldu aurretik egindako ligatan izandako erregulartasuna ere saritu zuten Landare elkartekoek, eta horren barruan, Errenteria-Oreretako lehen sailkatuek ere jaso zuten garaikurra. A sailean Gorka Etxeberria, eta B Sailean, berriz, Beñat Salegi izan ziren irabazleak.
Gipuzkoako Eusko Dantzarien Biltzarreko Estibaliz Iturriak maila bakoitzeko dantzariak txukun aritu zirela nabarmendu du: “Lan polita egin zuen bakoitzak bere sailean, batetik bestera adin tarte handia dagoela kontuan hartuta”.
Landare elkarteak antolatutako 26. aurresku txapelketan 27 haur aritu ziren dantzan larunbatean. Parte hartzaileek bi dantza egin behar izan zituzten. A sailekoek Alpargata eta agurra dantzatu zituzten eta B sailekoek, berriz, desafioa eta zortzikoa.
Juantxo Maia Landareko kide eta antolatzaileak ere ildo beretik hitz egin du, eta maila ona eman zutela azaldu du. Horrez gain, oso giro ona izan zela eta jende asko joan zela kulturgunera gaineratu du. Horrekin guztiarekin, txapelketak 26 urte bete arren, antolatzen jarraitu nahi dutela esan du.
