Belaunaldi berria iritsi da Banakora
2003ko udaberrian “taberna desberdin bat” ireki zuten Hondarribiko Txiplao eremuko industriagunean. Ez zuen beste ostatuen antzarik, berezia zen, apartekoa… eta horregatik jarri zioten Banako izena, banakoa izan nahi zuelako. Maiatzean bi urte bete dira taberna itxi zutenetik, baina gaur irekiko dute berriz ere, 17:00etan. Urbil Artola hondarribiarrak eta Nagore Martinez oiartzuarrak kudeatuko dute Banako berria. Artolak badaki Banakon lan egitea zer den; bere aita Txominek eta Mertxe Ezeizak ireki zuten 2003an, Txiplaon altxatu zituzten 300 metro koadroko pabilioietako batean. Zerbitzari bezala aritu izan zen bertan. 2010eko maiatzean pertsiana jaitsi zuten eta ordutik horrela egon da, itxita. Belaunaldi aldaketa iritsi da Banakora, ordea, eta gauza batzuk aldatuko direla esan du Artolak: “Batez ere asteburuetan aldatuko da, giroak askotarikoak izango direlako asteburuetako arratsaldetan edo gauetan”. Gaurtik hasita, asteartetik igandera arte irekiko dute taberna; lanegunetan goiz eta arratsaldez, eta larunbat eta igandetan 17:00etatik aurrera. “Ostiral eta larunbatetan goizaldeko lauretan itxiko dugu”, gehitu du hondarribiarrak. Bere aita bezala, musikaria eta musikazalea da Urbil Artola: Sorotan Belen jotzen zuen, aitarekin ere aritu izan da, eta Lemak proiektuan dabil. Hala izanik, musikak tabernaren nahitaezko bereizgarria izan behar zuen. Musikak ez ezik, oro har, kultura arloko emanaldiek lekua izango dute bertan, baina ostiral eta larunbat gauetan “batez [...]
2003ko udaberrian “taberna desberdin bat” ireki zuten Hondarribiko Txiplao eremuko industriagunean. Ez zuen beste ostatuen antzarik, berezia zen, apartekoa… eta horregatik jarri zioten Banako izena, banakoa izan nahi zuelako. Maiatzean bi urte bete dira taberna itxi zutenetik, baina gaur irekiko dute berriz ere, 17:00etan. Urbil Artola hondarribiarrak eta Nagore Martinez oiartzuarrak kudeatuko dute Banako berria.
Artolak badaki Banakon lan egitea zer den; bere aita Txominek eta Mertxe Ezeizak ireki zuten 2003an, Txiplaon altxatu zituzten 300 metro koadroko pabilioietako batean. Zerbitzari bezala aritu izan zen bertan. 2010eko maiatzean pertsiana jaitsi zuten eta ordutik horrela egon da, itxita. Belaunaldi aldaketa iritsi da Banakora, ordea, eta gauza batzuk aldatuko direla esan du Artolak: “Batez ere asteburuetan aldatuko da, giroak askotarikoak izango direlako asteburuetako arratsaldetan edo gauetan”.
Gaurtik hasita, asteartetik igandera arte irekiko dute taberna; lanegunetan goiz eta arratsaldez, eta larunbat eta igandetan 17:00etatik aurrera. “Ostiral eta larunbatetan goizaldeko lauretan itxiko dugu”, gehitu du hondarribiarrak. Bere aita bezala, musikaria eta musikazalea da Urbil Artola: Sorotan Belen jotzen zuen, aitarekin ere aritu izan da, eta Lemak proiektuan dabil. Hala izanik, musikak tabernaren nahitaezko bereizgarria izan behar zuen. Musikak ez ezik, oro har, kultura arloko emanaldiek lekua izango dute bertan, baina ostiral eta larunbat gauetan “batez ere musika” nagusi izango dela dio Urbil Artolak: “Kontzertuak antolatuko ditugu eta programatzaileekin harremanetan jarriko gara aretoa eskaintzeko”. Lehenengo Banakon ere antolatzen zituzten musika emanaldiak, baina bihartik aurrera «maiztasun handiagorekin» egin nahi dute hori.
Lehenengoa, ekainaren 8an
Uztailean Hondarribian egiten den Nazioarteko Blues Jaialdia iragartzeko Road to Memphis egitasmoa antolatu izan dute azken urteetan, ekainean. Hiriko zenbait tabernatan blues kontzertuak eskaintzen dituzte, eta Banako berriak bere estraineko musikala izango du ekainaren 8an, Road to Memphis-en barruan. Casual Blues talde oreretarra ariko da, gaueko hamaiketatik aurrera. Momentuz hori da iragarri duten kontzertu bakarra, baina ez dirudi denbora asko behar izango dutenik zerrendako bigarrenaren berri emateko.
Kontzertuez gain, bestelako emanaldiak ikusi eta entzuteko aukera izango da Txiplaoko tabernan, nahiz eta oraindik zer eta noiz zehaztu gabe duten. “Hiru metroko pantaila erraldoia erosi dugu eta agertokia dagoen aldean jarri dugu. Hor denetarik eskaini ahal izango dugu: filmak, kontzertuen grabazioak…”.
Gaur arratsaldetik irekiko du berriro Banako tabernak; asmo berrituekin irekiko dute, eta lehen segundotik hori frogatzeko aukera izango da. Gaur eta bihar DJ Norma ariko da musika jartzen, ateak irekitzetik itxi arte. Arratsaldean lasai egoteko aukera izango da, garagardo onez gozatzeko ere. Gose direnek jateko zerbait eskatu ahalko dute, eta sabaiko leihotik argia gutxitzen joaten den heinean mahaietatik altxatu eta barra ondora joateko gogoa sartuko zaie, bertan dantza egin edo solasaldian jarraitzeko, lasai.


