Jaitsieratik sei puntura dago Olaberen taldea
Gimnastica Segoviana (Gaztela eta Leon, Espainia) taldearen aurka aritu zen Real Union herenegun arratsaldean, etxetik kanpo. Txuri-beltzek zortzi jokalarirekin bukatu zuten partida, epaileak Sellares, Yuri eta Martinez kanporatu ondoren. Roberto Olabe...
Gimnastica Segoviana (Gaztela eta Leon, Espainia) taldearen aurka aritu zen Real Union herenegun arratsaldean, etxetik kanpo. Txuri-beltzek zortzi jokalarirekin bukatu zuten partida, epaileak Sellares, Yuri eta Martinez kanporatu ondoren. Roberto Olabek eta Chuchik ere txartel gorria jaso zuten, eta beste hainbatek, berriz, horia. Hala, 4-2 galdu zuten Segovian, eta Irungo taldea orain, jaitsiera postuetatik sei puntura besterik ez dago.
Ondo hasi zuen Unionek partida. Lehen gola, hasieratik bederatzi minutura sartu zuen Galanek. Handik zazpi minutura Segovianak berdinketa lortu zuen. Hala ere, 20. minutuan Sellaresek Irungo taldea berriz ere aurretik jartzea lortu zuen, eta orduan bukatu zen Unionen zortea.
Kanporaketak eta porrota
Hala, txartel hori bikoitzaren ondorioz, 22. minutuan Sellares kanporatu zuen epaileak. 30. minutuan binako markagailua lortu zuten espainiarrek. 40. minutuan lasaitasuna nagusitu arren, 73. minutuan, Yuri eta Martinezi gorria atera zien epaileak. Hortik aurrera eromena nagusitu zen. Izan ere, aulkian zegoen Chuchi ere kanporatu zuen epaileak, eta 89. minutuan Segovianak 3-2koa sartu zuen.
Minutu horretan bertan txartel gorria atera zion epaileak Roberto Olabe entrenatzaileari, eta 90. minutuan, penaltiz, azken gola sartzea lortu zuen Segovianak.
Barranco, Ekhi, Alvarez eta Romo jokalari txuri-beltzei ere txartel horia atera zien epaileak.
