Herriko hiru boluntario beterano omendu ditu Gurutze Gorriak
Errenteriako Gurutze Gorriak Victoria Arrieta, Eugenio Boubeta eta Jose Luis Trapero herriko hiru boluntario omendu zituen pasa den urtarrilaren 21ean “egunez egun, urteak joan eta etorri, egin duten lana aitortzeko”. Jose Antonio Fernandez...
Errenteriako Gurutze Gorriak Victoria Arrieta, Eugenio Boubeta eta Jose Luis Trapero herriko hiru boluntario omendu zituen pasa den urtarrilaren 21ean “egunez egun, urteak joan eta etorri, egin duten lana aitortzeko”.
Jose Antonio Fernandez Errenteriako Gurutze Gorriko presidenteak eman zien plaka eta diploma hiru boluntarioei. Era berean, Goierriko asanbleari ere egindako lana aitortu zioten ekitaldi horretan.
Victoria Arrieta 1995etik dabil Errenteriako Gurutze Gorrian kolaboratzen. Orain, batik bat Jesusen Bihotza zaharren egoitzan egiten du boluntario lana.
Eugenio Boubetak, berriz, duela 15 urtetik Gurutze Gorriko administrazio eta altxortegi lanetan dihardu, eta beste ekintza batzuk ere egiten ditu, batik bat adinekoen aisia dinamizatzearekin lotutakoak.
Hirugarren omendua, Jose Luis Trapero, Arrieta bezala 1995etik dago Gurutze Gorrian. “Urte hauetan zehar boluntario lana modu jarraian egiten aritu da eta gelditu gabe gainera”, adierazi dute erakundetik.
