Lanpostuak ziurtatzeko eskatu dute Sabecoko langileek
Murias Center 4k eta Eroskik sinatu zuten hitzarmenaren haritik, Sabecoko langile izan zirenek euren lanpostua ziurtatzeko eskatu diote udalari, Niessen merkataritza zentroa kudeatzen duen enpresaren %10aren parte izanik. Supermerkatuan lan egiten zute...
Murias Center 4k eta Eroskik sinatu zuten hitzarmenaren haritik, Sabecoko langile izan zirenek euren lanpostua ziurtatzeko eskatu diote udalari, Niessen merkataritza zentroa kudeatzen duen enpresaren %10aren parte izanik. Supermerkatuan lan egiten zuten 40 langileen subrogazioa bermatu ondoren, Gipuzkoako elikaduraren hitzarmena ere ezar diezaieten eskatu dute langile ohiek.
Bi elementu horiek biltzen dituzte 2009an eta 2010ean udalbatzarrak onartutako bi akordioek. Hain zuzen, hori betearaztea da, Sabecoko langile izan zirenek eskatzen dutena.
Duela bi aste izan zuen udalak Murias Center 4 eta Eroskiren arteko hitzarmenaren berri. Enprearen %10aren parte izanik, udalak akordioaren baldintzak jakinarazteko eskatu zion Murias Center 4ri. Horrekin batera, udalbatzarrak hitzartutakoa berretsi zuen, eta hori errespetatzeko eskatu zion Niessen kudeatzen duen enpresari ere.
“Langileez libratu nahi zuten”
Pasa den urtean langileak kalean geratu ziren enplegua erregulatzeko espedientea bukatu zitzaielako. Murias Center 4ri enpresaren batekin kontratua ixteko eskatu zioten kalean ez geratzeko, baina gehiegi atzeratu zen. ELAren arabera, enpresak langileez libratu nahi zuen, hamalau hilabetez greban egon ziren langileek zigorra izateko.
Eroskik aurretik egindako proposamenen aurrean, ELAk gogorarazi du ez zuela langile guztientzako lanpostua bermatzen, kooperatibizatzeko eskatzen ziela —”ekonomikoki onartezina langileentzat”—, eta orduko Sabecok ordaintzen zien kopuru berbera proposatu zuela. Muriasi akordioak betetzeko eskatu dio ELAk.
