Aldundiak ez du Finantzaketa Funtsaren gaineko proposamenik onartu
2011. urteko Foru Finantzaketa Funtsaren gaineko bilera egin zuten atzo Gipuzkoako Foru Aldundiak eta lurraldeko udal guztiak, Irungo Udala tartean. Egoera honen aurrean, egonezina agertu du tokiko gobernuak, “aldundiak ez baititu udalen proposam...
2011. urteko Foru Finantzaketa Funtsaren gaineko bilera egin zuten atzo Gipuzkoako Foru Aldundiak eta lurraldeko udal guztiak, Irungo Udala tartean. Egoera honen aurrean, egonezina agertu du tokiko gobernuak, “aldundiak ez baititu udalen proposamenak entzun nahi izan”.
Horiek horrela, Irungo Udalaren proposamena -4.500.000 euroren %50a 2012. urteko bigarren sei hilabeteetan itzultzea eta gainontzekoa 2009ko itzulpena bukatu arte atzeratzea- bertan behera gelditu da.
Miguel Angel Paez Irungo Garapen Ekonomikorako eta Ogasun delegatuak adierazi duenez, “Ahaldun Nagusia haren planak azaltzera mugatu da eta ez du inongo proposamen edota formula alternatiborik onartu”.
Hiru aukera
Hortaz, hiru aukera eman ditu aldundiak 2011. urteko aportazioa likidatzeko. Lehenengo bi aukeren arabera, “kopuruaren %50a otsailean bertan itzultzea eskatzen da”. Eta hori Irungo Udalaren iritziz “beste arazo bat da, udalek ez baitute udal zergen diru guztia maiatzera arte biltzen”.
Gainontzeko %50ari dagokionez beste bi aukera dituztela jakinarazi du Paezek: urte bukaerara bitartean zuzenean itzultzea, edota urtea amaitu aurretik egitea, “aldez aurretik aldundiarekin negozioatutako kreditu baten bitartez”. Horrez gain, azken aukera horri helduz gero, Gipuzkoako Foru Aldundiak udalen kontu ekonomikoen jarraipena gainbegiratuko luke.
Azkenik, tokiko gobernuak adierazi duenez, “egoera oso kritikoan aurkitzen diren udalen kasuan, diputazioaren eskusartzea izan daitekeela ere ziurtatu dute”.
