Ostalaritza eta aisia sustatzeko proposamenak plazaratu ditu PPk
Bide seinale gehiago, begiratokia, ibilbide turistikoak eta espaloiak eta errepideak txukuntzea eskatu dute. Pasaian ostalaritza eta turismoa sustatzeko helburuz, hainbat proposamen helarazi dizkie PPk udalerriko gainontzeko indar politikoei, gerora ...
Bide seinale gehiago, begiratokia, ibilbide turistikoak eta espaloiak eta errepideak txukuntzea eskatu dute.
Pasaian ostalaritza eta turismoa sustatzeko helburuz, hainbat proposamen helarazi dizkie PPk udalerriko gainontzeko indar politikoei, gerora babes ditzaten. PPko bozeramaile David Hernandezek azaldu duenez, proposamenak herriko ostalariekin batera adostutakoak dira.
Udalerrirako sarrerak ondo identifikatzea eskatuko du PPk, popularren iritziz dauden bide seinaleak eskasak direlako. Horrez gain, nekazal turismoa bultzatu eta Jaizkibelen, Lizeotik gertu, begiratoki bat jartzea proposatuko dute.
Ipar Euskal Herrian sustatu nahiko luke PPk Pasaiaren irudia, Hendaia, Donibane Lohizune eta Biarritz inguruan, handik eros ahalmen handiko jendea erakar daitekeela uste baitu.
«Garrantzitsua deritzogu udalerriko kaleak garbi mantentzeari, eta espaloiak eta errepideak txukuntzeari, horrek, gure udalerriko irudia hobetu ez ezik, pasaitarren bizi-kalitatea ere hobetuko duelako», gaineratu du.
