‘Nagore’ filmari lotutako hezkuntza materiala banatuko dute eskoletan
Nagore Laffage gazte irundarraren hilketa eta ondorengo epaiketa lantzen dituen Nagore filmaren gaineko hezkuntza materiala banatuko dute hiriko Bigarren Hezkuntzako eta Batxilergoko ikastetxeetan. Helena Taberna zuzendari iruñearrak egindako filmari lotutako DVDa eta 80 orriko liburua argitaratu dute, eta Gabonak baino lehen banatuko dute eskoletan. Laffageren amak, Asun Casasolak, eta Maite Cruzado Gizarte Ongizateko ordezkariak atzo aurkeztu zuten ekimena. Casasolak hainbat hitzaldi eman ditu Espainiako Estatuko ikastetxeetan, eta ikasleak filmarekin “harrituta” geratzen direla adierazi zuen. Bere alabarenak bezalako gertakari asko ezkutuan geratzen direla esan zuen, eta Tabernaren filma gazteentzako oso egokia dela nabarmendu zuen: “Gazteekin lan egin behar da, zerbait ikasi dezaten, berriro gertatu ez dadin”. Hezkuntza materiala Iruñeako Lamia ekoiztetxeak prestatu du, Helena Tabernak berak zuzenduta, eta Nafarroako hiriburuko pedagogia adituen laguntzarekin. Gizarte Ongizate arloak hogei kopia erosi ditu, ikastetxeetan banatzeko. Gabonak baino lehen banatuko dituzte. Bi saio Zinema Paradison Abenduan Nagore filmaren bi saio emango dituzte Amaia KZn, Zinema Paradiso programaren barruan. Lehen saioa etzi izango da, eta bigarrena abenduaren 16an. Bi saioak arratsaldeko zortzietan hasiko dira, eta doan izango dira. Nagore Laffageren heriotza lantzen du Helena Tabernaren filmak. Laffageren amak parte hartzen du, eta gaztearen senitarteko eta lagunen testigantzak ageri dira. Dokumentalak Laffageren hiltzailearen kontrako epaiketa kontatzen du [...]
Gazteek zerbait ikas dezaten material ona dela uste du Asun Casasolak
Nagore Laffage gazte irundarraren hilketa eta ondorengo epaiketa lantzen dituen Nagore filmaren gaineko hezkuntza materiala banatuko dute hiriko Bigarren Hezkuntzako eta Batxilergoko ikastetxeetan. Helena Taberna zuzendari iruñearrak egindako filmari lotutako DVDa eta 80 orriko liburua argitaratu dute, eta Gabonak baino lehen banatuko dute eskoletan.
Laffageren amak, Asun Casasolak, eta Maite Cruzado Gizarte Ongizateko ordezkariak atzo aurkeztu zuten ekimena. Casasolak hainbat hitzaldi eman ditu Espainiako Estatuko ikastetxeetan, eta ikasleak filmarekin “harrituta” geratzen direla adierazi zuen. Bere alabarenak bezalako gertakari asko ezkutuan geratzen direla esan zuen, eta Tabernaren filma gazteentzako oso egokia dela nabarmendu zuen: “Gazteekin lan egin behar da, zerbait ikasi dezaten, berriro gertatu ez dadin”. Hezkuntza materiala Iruñeako Lamia ekoiztetxeak prestatu du, Helena Tabernak berak zuzenduta, eta Nafarroako hiriburuko pedagogia adituen laguntzarekin.
Gizarte Ongizate arloak hogei kopia erosi ditu, ikastetxeetan banatzeko. Gabonak baino lehen banatuko dituzte.
Bi saio Zinema Paradison
Abenduan Nagore filmaren bi saio emango dituzte Amaia KZn, Zinema Paradiso programaren barruan. Lehen saioa etzi izango da, eta bigarrena abenduaren 16an. Bi saioak arratsaldeko zortzietan hasiko dira, eta doan izango dira.
Nagore Laffageren heriotza lantzen du Helena Tabernaren filmak. Laffageren amak parte hartzen du, eta gaztearen senitarteko eta lagunen testigantzak ageri dira. Dokumentalak Laffageren hiltzailearen kontrako epaiketa kontatzen du batik bat, eta prozesuko irudiak jasotzen ditu: inplikatutako alderdien ikuspuntuak, artxiboko materiala eta hilketaren berreraikitze-irudiak, besteak beste.
