Oarsoaldeko igerilariek markak hautsi dituzte Euskadiko lehian
Oarsoaldea Igeriketa Kirol Elkarteko igerilariak bikain ibili ziren larunbatean Gasteizko Mendizorrotza igerilekuan egindako Haurren Mailako Euskadiko Txapelketan. Elkarteko zazpi ordezkari zeuden Gipuzkoako selekzioan, eta lan ona egin zuten denek. Guztien artean Jon Aizpuru eta Oihana Goenaga nabarmendu ziren, Gipuzkoako bi marka hautsi baitzituzten, eta Aizpuruk baita Euskadiko beste bi marka ere.
Aizpuruk 100 metroko bular proban 1.10,98 egin zuen, eta horri esker, Gipuzkoako errekorra (1.15,93) eta Euskadikoa (1.14,35) gainditu zituen. Oarsoaldea Igeriketa Kirol Elkartetik jakinarazi dutenez, hogei urteren ondoren gainditu dute aurreko marka. 200 metroko bular proban 2.36,11 egin zuen, Gipuzkoako errekorra bederatzi segundotan hobetuz, eta Euskadikoa ia lau segundotan.
Oihana Goenagak, berriz, hamabi urteren ondoren, 100 eta 400 metro estilotan Gipuzkoako errekor berriak egin zituen: 100 metrotan 1.02,60 egin zuen, aurreko marka bost ehunenekoetan hobetuz. 400 metrotan, berriz, 11 segundotan hobetu zuen aurreko marka, 5.33,86 eginez. Maila horietan ez daude Euskadiko errekorrak argitaratuta.
Beste igerilariak ere ondo
Oarsoaldea Igeriketa Kirol Elkarteko gainontzeko igerilariak ere ondo ibili ziren. Elena Rodriguezek lehenengo postua eman zion Gipuzkoako selekzioari 100 metro bular proban, bigarren postua 100 metro tximeleta proban, eta hirugarren postua 200 metro tximeleta proban.
Eider Peñak bigarren egin zuen 200 metro bizkar proban, hirugarren 100 metro bizkar proban eta bosgarren 200 metro estiloan.
Pablo Etxeberriak laugarren egin zuen 1.500 metrokoan eta hirugarren 400 metrokoan. Oier Elissalt bosgarrena izan zen 1.500 metroko lehian, seigarrena 100 bizkar proban eta bigarrena 200 metro estiloan. Mikel Benito, azkenik, bederatzigarrena izan zen 400 metro estiloan.
