Krisiaren ondorioak salatzeko protestak egingo ditu LABek
Krisiak Oarsoaldean eta Bidasoan utzi dituen ondorioak salatzeko manifestazioa antolatu du biharko LABek. 12:00etan irtengo dira Herriko Enparantzatik. LABen arabera, “krisialditik atera baino, krisi handiago baten atarian” dago gizartea. &...
Krisiak Oarsoaldean eta Bidasoan utzi dituen ondorioak salatzeko manifestazioa antolatu du biharko LABek. 12:00etan irtengo dira Herriko Enparantzatik.
LABen arabera, “krisialditik atera baino, krisi handiago baten atarian” dago gizartea. “Denborak arrazoia” eman diela esan dute, langileek krisia “euren bizkar” hartu beharko zutela iragarri zutenean, eta hainbatek “langileen eskubideak murrizteko eta eredu kapitalistan sakontzeko” erabiliko zutela salatu zutenean.
Madrildik hartutako neurriak egin dituzte horren erantzule, “krisia sortu duten eraikuntzako enpresei eta bankuei diru publikoa oparitu dieten bitartean”. Gaineratu dutenez, “gezurra” esan dute bankuek: “Gerrikoa estutzea beharrezkoa zela esanda, dietak, dibidenduak eta dirutzak jasotzen zituzten bitartean, Espainiako Estatuak 185.000 milioi euro oparitu dizkie”.
Erreformak kaleratzeak ere areagotu dituela salatu dute. Hala, 2008ko irailean, Oarso Bidasoan, 6.565 langabe zeudela azaldu dute; 2010eko irailean, lan erreformarekin batera, 9.520 langabera igo zela kopurua, eta egun, 10.030 langabe daudela.
“Gezurra, gezurra eta gezurra. Hori da hainbat politikarik hitzetik hortzera darabiltena”, esan dute LABetik. Hala, irakurketa hori lantegiz lantegi zabaldu nahi dutela jakinarazi dute “erasoei lantokiz lantoki aurre egin” behar zaiela iritzi baitiote. Gaineratu dute langileen iritziek eztabaidaren parte izan behar dutela.
