Batzar Nagusiak, San Marko behin betiko ixtearen alde
Gipuzkoako Batzar Nagusiek San Markoko zabortegia “ahalik eta lasterren eta behin betiko” ixteko eskatu dute. Horrekin batera, egun indarrean dagoen Hondakinen Plana babestu dute. Joan den asteazkenean PSE-EEk Batzar Nagusietan aurkeztutako...
Gipuzkoako Batzar Nagusiek San Markoko zabortegia “ahalik eta lasterren eta behin betiko” ixteko eskatu dute. Horrekin batera, egun indarrean dagoen Hondakinen Plana babestu dute.
Joan den asteazkenean PSE-EEk Batzar Nagusietan aurkeztutako mozioa aurrera atera zen. EAJrekin adostuta zegoen mozioa, eta PPk ere bat egin zuen eskaerarekin. Bilduk osoko zuzenketa aurkeztu zuen, baina ez zen aurrera atera.
Onartutako mozioarekin, Batzar Nagusiek aldundiari honakoa eskatu diote: “Udalekin eta San Markoko Mankomunitatearekin elkarlanean, lehenbailehen zabortegia ixteko beharrezko kudeaketak egitea”. Horrez gain, San Markoko ingurua parke bihurtzeko apustu irmoa egin dezala eskatu zuten mozioan.
Bestalde, Errenteriako PSE-EEk gogorarazi du urriaren 26ko Errenteriako Udalaren udalbatzarrean eurek aurkeztutako mozio bat onartu zuela Udalbatzak.
Mozioaren bi puntuetako batean aldaketa egin zuten udalbatzar horretan asdostasunera heltzeko, eta horrenbestez, Errenteriako Udalak San Markoko zabortegia behin betiko ixteko eskatu, eta itxiera ahalik eta azkarren egin zezan galdegin zion San Markoseko Mankomunitateari eta Gipuzkoako Hondakinen Partzuergoari.
Erabakiarekin pozik
Errenteriako PSE-EEko kideak pozik azaldu dira Batzar Nagusien erabakiarekin, baina era berean, Gipuzkoako Foru Aldundiari eskatu diote eskaera horri erantzuteko.
Horrez gain, udalari udalbatzarrean onartutakoa aurrera eraman dezan eskatu diote, eta hori hala ez bada, “hori defendatzen” jarraituko dutela esan dute.
