Portuko txatarra deskargak mugatzeko eskatu du udalak
Errenteriako Udalak Pasaiako portuan egiten diren txatarra deskargak mugatzea nahi du. Izan ere, arazoak eragiten dizkie Kaputxinoak auzoko bizilagunei. Hala nola, hautsa eta isuriak jasan behar dituzte. Errenteriako udaltzainek salaketa ere jaso dutel...
Errenteriako Udalak Pasaiako portuan egiten diren txatarra deskargak mugatzea nahi du. Izan ere, arazoak eragiten dizkie Kaputxinoak auzoko bizilagunei. Hala nola, hautsa eta isuriak jasan behar dituzte. Errenteriako udaltzainek salaketa ere jaso dutela zehaztu du udalak.
Zehazki, joan den astearteko gertaerak gogorarazi ditu Jose Manuel Ferradas Ingurumen zinegotziak, hauts metalikozko laino batek ilundu baitzuen auzoa. Ferradasen arabera, “praktika txarrak” dira, “txatarra deskargak ez daudelako mugatuta, nahiz eta urez bustitzen duten txatarra bera”. Era berean, Portu Agintaritzaren pasibotasuna salatu du. Horren aurrean, departamenduak ezin duela “besoak gurutzatuta geratu” adierazi du.
Hala, Ingurumen Sailak Pasaiako portuko jarduera jarraitzeko, Erakundearteko Koordinazio Batzordea berriro martxan jartzeko eskatuko du. Bertan, udalak, aldundia, Portu Agintaritza eta Eusko Jaurlaritza bilduko dira. Horrez gain, Lucio Hernando presidenteari “urgentziaz” Oarsoaldeko udalerriekin bilera egiteko eskatuko dio, “arazoari aurre egin, eta kudeaketa modernizatzeko”. Azkenik, Jaurlaritzari bitartekari lanak egiteko eskatu dio, neurketak egin eta portuko kutsadura kontrolatzeko.
