1611n lau sorginei egindako epaiketa gogoratuko dute
Oroitzapen baten berri eman nahi dute Hondarribian: 1611n lau sorginei egindako epaiketa. 400 urte betetzen dira eta XII. mendeko giroa berreskuratuko dute bi egunez. Publiko guztiak parte hartzeko helburuarekin, hitzaldia, antzerkia eta tailerrak anto...
Oroitzapen baten berri eman nahi dute Hondarribian: 1611n lau sorginei egindako epaiketa. 400 urte betetzen dira eta XII. mendeko giroa berreskuratuko dute bi egunez. Publiko guztiak parte hartzeko helburuarekin, hitzaldia, antzerkia eta tailerrak antolatu dituzte Arma Plazan.
Ekimena bihar hasiko dute `Inesa Gaxen eta bere ingurua. Zalantzak´ hitzaldiarekin, eta Hondarribiko historia ezagutzeko aukera izango da. XVII. mendean Lapurdin Pierre Lancre inkisidoreak sortutako sorgin jazarpenetik ihesean jende asko etorri zen Hondarribira, eta 1611n bertan bizi ziren Maria de Yllarra, Maria de Echegaray, Maria de Garro eta Inessa de Gaxen andreen aurka sorginak ziren salaketapean epaiketa egin zuten. “Inessa de Gaxen izan zen sorginkeriak ukatu zituen bakarra, emakume ausarta izan zen eta Hendaiara desterratua izan zen», esan du Miren Ayerbek, udal arkeologoak.
Akelarrea arratsean
Larunbatean mozorro tailerra egingo dute eta “egindako mozorroak akelarrearen antzezpenera eraman ahalko dira” azaldu du Idoia Aseijok, Menina tailerreko artistak. Gainera, tailerrean egindako sorginen txotxongiloak salgai jarriko dituzte.
Arratsean, Hondarribian 1611n egindako sorgin epaiketaren antzezpena Zugarramurdiko Sorgin Haizea antzerki taldeak eskainiko du eta Hondarribiko zenbait aktorek parte hartuko dute.
