Hobe euskaraz eskatuta
“Kafe bat aterako didazu?”. Keinu hori besterik ez da behar bi afari ederren zozketa batean parte hartzeko. Urriaren 9a arte, Oarsoaldeko establezimenduren batean euskaraz eskatzeak saria izango du Ze ateakoizut? kanpainaren bidez. Oarsoaldea Garapen Agentziak antolatutako lehiaketa da hori, eta euskara erabiltzen duten bezeroak izango dira horren onuradunak.
Zehazki, eskualdeko herri bakoitzeko irabazle bat izango da, eta bi lagunentzako bazkari edo afaria eramango du Trintxerpeko Izkiña edo Oiartzungo Zuberoa jatetxean. Era berean, txartel irabazlea tokatzen den tabernako jabeak ere bi lagunentzako otordua irabaziko du bi jatetxe horietako batean. Saria, beraz, bikoitza izango da: bezero zein jabearentzat.
Ia 70 taberna eta jatetxek bat egin dute garapen agentziaren azken ekimenarekin: Pasaian hamaseik, Oiartzunen 33k eta Errenteria-Oreretan hogeik. Antolatzaileek jakinarazi dute beste ostalariren batek parte hartu nahi izanez gero, oraindik aukera daukala izena emateko. Horretarako, Oarsoaldearekin harremanetan jarri besterik ez du egin beharko 943 49 41 29 telefono zenbakian edo postaz oarsoaldea@oarsoaldea.net-en.
Ekimen horren bidez, ostalaritza sektorean ere euskararen presentzia eta erabilera sustatu nahi dute antolatzaileek, batez ere, bezeroengan euskaraz eskatzeko ohitura indartzeko.
Elkarlana
Oarsoaldeko Euskara Batzordearekin elkarlanean hamalau urte egin ditu garapen agentziak euskararen presentzia eta erabilera sustatzeko asmoarekin. Helburu hori lortzeko, hala nola, doako zerbitzuak eskaintzen dituzte. Gainera, urtero gremio bat finkatzen dute ahalegin berezia egiteko, eta aurten ostalaritzan daude zentratuta. Urtean zehar hainbat kanpaina egin dituzte.
Tabernen zerrenda
- Errenteria-Orereta: Maite taberna, Sindikato taberna, Errota taberna, Buxan, K-B, Irrintzi taberna, Lantxeta taberna, Txoko taberna, Bienvenido erretiratuen elkartea, Oiartzun taberna, Oberena taberna, Laket taberna, Manuel taberna, Agustina taberna, Leku-Zaharra taberna, Batzoki jatetxea, Zamalbide jatetxea, Gurkale Txirrita, Gaztelu ostatua, Crespo taberna.
- Oiartzun: Ainhara taberna, Alhambra taberna, Amazkar taberna, Bikain taberna, El Paso taberna, Galdos taberna, Ganbara taberna, Gu-bi, Gutizi txokoa, Irubide, Irundarrene, Kastro Berri taberna, La casa del jamón, Makutxo, Marcos, Miren, Museo del vino, Sorgin taberna, Toki Alai, Toki Ona, Ttantta, Bide-alde jatetxea, Esnoiz jatetxea, Fortaleza Berri jatetxea, Intxixu jatetxea, Iriberri jatetxea, Kapeo jatetxea, Paki jatetxea, Pikoketa jatetxea, Tolare jatetxea, Arritxulo aterpetxea, Elorsoro kiroldegiko taberna, Oliden kanpineko taberna.
- Pasaia: Remos taberna, Alabortzako kantina eta Atari taberna (Donibane); Izkiña eta Erdibana (Trintxerpe); Marisol, Amura, Antxeta, Gure Borda eta Muguruza edaritegia (San Pedro); Mimos taberna, Dani taberna, Leunda jatetxea, Ekarri, Laket, Etxe-ona taberna (Antxo).
