Zabaltza izango da Mugikortasun Iraunkorraren Europako Astearen plaza
Azken urteotako bideari jarraituz Mugikortasun Iraunkorraren Europako Astearekin bat egin du Irungo Udalak, eta asteburuan hainbat ekimen egingo dituzte Zabaltza plazan, motordun ibilgailuak gutxiago eta garraio publikoa eta bizikletak gehiago erabiltzearen beharraz ohartarazteko. Udalak abuztuan martxan jarri zituen aurrez aurreko neurriez informatuko du, eta oposizioko taldeek horiek baloratzeko probestuko dute astea. Biharko eta etzirako hainbat ekimen antolatuko dituzte Zabaltza plazan. Bizikleta martxa eta zenbait azoka prestatu dituzte, denak mugikortasun iraunkorrarekin harremana izango dutenak (ikus ekitaldien zerrenda beheko koadroan). Hiri Mugikortasun Iraunkorraren Planari eta uztailean onartutako aurrez aurreko neurriei buruzko informazioa zabalduko du udalak bertan. Argazkilaritza lehiaketa bat ere antolatu dute aste honen harira. Hiru gairen gaineko irudiak aurkeztu behar dira: mugikortasuna, energia eraginkortasuna eta ingumena. Lanak urriaren 19ra arte aurkez daitezke (ikus oinarriak irun.org webgunean). EAJk inbertsioak eskatu ditu Mugikortasun Iraunkorraren Europako Astean alderdi politikoek gaiaren gainean dituzten proposamenak ezagutarazi dituzte. EAJk mugikortasun arazoak konpontzeko inbertsioak eskatu ditu. Xabier Iridoy bozeramailearen esanetan, «erdigunetik ibiltzen diren ibilgailuen abiadura murriztu behar da, baina alternatibak eskaini behar zaizkie». Kanpoaldeko errepide azkarrak garatzea, saihesbidea bizkoiztea eta hegoaldeko erronda eraikitzearen alde azaldu da Iridoy, «motordun ibilgailuak arin zirkulatzeko eta erdiguneko trafikoan pilaketak ekiditeko». Abiadura orduko 30 kilometrora mugatuta dagoen kaleetan txirrindulariek espaloietatik joatea debekatu izanaren [...]
Azken urteotako bideari jarraituz Mugikortasun Iraunkorraren Europako Astearekin bat egin du Irungo Udalak, eta asteburuan hainbat ekimen egingo dituzte Zabaltza plazan, motordun ibilgailuak gutxiago eta garraio publikoa eta bizikletak gehiago erabiltzearen beharraz ohartarazteko. Udalak abuztuan martxan jarri zituen aurrez aurreko neurriez informatuko du, eta oposizioko taldeek horiek baloratzeko probestuko dute astea.
Biharko eta etzirako hainbat ekimen antolatuko dituzte Zabaltza plazan. Bizikleta martxa eta zenbait azoka prestatu dituzte, denak mugikortasun iraunkorrarekin harremana izango dutenak (ikus ekitaldien zerrenda beheko koadroan). Hiri Mugikortasun Iraunkorraren Planari eta uztailean onartutako aurrez aurreko neurriei buruzko informazioa zabalduko du udalak bertan.
Argazkilaritza lehiaketa bat ere antolatu dute aste honen harira. Hiru gairen gaineko irudiak aurkeztu behar dira: mugikortasuna, energia eraginkortasuna eta ingumena. Lanak urriaren 19ra arte aurkez daitezke (ikus oinarriak irun.org webgunean).
EAJk inbertsioak eskatu ditu
Mugikortasun Iraunkorraren Europako Astean alderdi politikoek gaiaren gainean dituzten proposamenak ezagutarazi dituzte. EAJk mugikortasun arazoak konpontzeko inbertsioak eskatu ditu. Xabier Iridoy bozeramailearen esanetan, «erdigunetik ibiltzen diren ibilgailuen abiadura murriztu behar da, baina alternatibak eskaini behar zaizkie». Kanpoaldeko errepide azkarrak garatzea, saihesbidea bizkoiztea eta hegoaldeko erronda eraikitzearen alde azaldu da Iridoy, «motordun ibilgailuak arin zirkulatzeko eta erdiguneko trafikoan pilaketak ekiditeko».
Abiadura orduko 30 kilometrora mugatuta dagoen kaleetan txirrindulariek espaloietatik joatea debekatu izanaren aurka agertu dira jeltzaleak: «Txirrindulariengan segurtasun arazoak sortzen ditu». Iridoyren iritziz, «bidegorririk ez dagoen tokietan oinezkoek eta txirrindulariek hiriko espaloi zabalenak partekatu behar dituzte, bizikleten abiadura mugatuz». EAJren zinegotziak gogoratu du Kolon pasealekuko hiritartzean bidegorririk ez zela eraiki.
Bidegorriak lotzeko beharra
PPk trafikoa arintzeko zenbait proposamen egin ditu aste honetan. Herenegun komunikabideak elkartu zituen Juana Bengoetxea popularren bozeramaileak, orduko 30 kilometroko muga «eraginik gabeko neurria» izan dela adierazteko. «Txirrindulariei euren segurtasuna axola zaie, denei bezala, eta 30 Kaleetako erraila ez dute erabiltzen, ez dutelako babesik sentitzen», adierazi zuen. Erdiguneko kaleetan espaloi bat oinezkoentzat eta beste bat konpartitua izatea proposatu zuen Bengoetxeak.
Motorrentzako aparkaleku gehiago egokitzea galdegin du PPk. «Motorrek trafikoa arintzen dute eta hiria iraunkorragoa da», esan zuen Bengoetxeak.
ELA sindikatua ere mintzatu da Mugikortasun Astearen harira. Udalak berriki hartutako aurrez aurreko neurrien kontra azaldu da ELA, bereziki zenbait kaleetan abiadura orduko 30 kilometrora mugatzearen aurka. «Hiriko bidegorrien arteko loturarik ez dagoelako eta Kolon pasealekuan txirrindularientzako bidegorririk eraiki ez dutelako. Neurri horiekin bi arazo horiek konpondu nahi dituzte», salatu dute.
Sindikatu abertzalearen ustez, «mugikortasun iraunkorrak oinarri batzuk behar ditu: garraio publiko eraginkorra, oinezkoentzako bideak, bidegorri sare osatua eta ibilgailu pribatuaren erabileraren aurkako disuasio-neurriak.
Zabaltza plazan antolatutako ekintzak
Bihar, larunbata
- Ekobira azoka. Kutxako Ekoguneak eta Emausek antolatutako kontsumo arduratsuaren azoka. Ibilgailu elektrikoen erakustaldia izango da 10:00etatik 14:00etara eta 17:00etatik 20:00etara.
- Informazio gunea. Hiri Mugikortasun Iraunkorraren Planari buruzko informazioa. 10:00etatik 14:00etara eta 17:00etatik 20:00etara. Etzi ere irekiko dute, goizez. Euria eginez gero Artalekura mugituko dute, eta goizez bakarrik egingo da.
Etzi, igandea
- Mugitruk azoka. Mugikortasun iraunkorraren bigarren eskuko azoka. 11:00etatik 14:00etara eta 16:30etik 19:30era.
- Bizikleta martxa. Hiriko bidegorrietatik eta 30 Kaleetatik barrena. 10:00etan abiatuko da. Bizikletak alokatzeko zerbitzua egongo da, doan.
