Portuko bigarren faseko lanen lehiaketa uztailaren 18an itxiko dute
Uztailaren 18an bukatuko da Matxin Artzu eta Bernat Etxepare kaleko lanen bigarren faseko lehiaketara aurkezteko epea. Aurrekontua 3.097.000 eurokoa da eta eraikitzeko epea 9 hilabetetakoa. Proiektuari dagokionez, “zenbait puntutan sareak berritzera...
Uztailaren 18an bukatuko da Matxin Artzu eta Bernat Etxepare kaleko lanen bigarren faseko lehiaketara aurkezteko epea. Aurrekontua 3.097.000 eurokoa da eta eraikitzeko epea 9 hilabetetakoa.
Proiektuari dagokionez, “zenbait puntutan sareak berritzerakoan oinezkoei lehentasuna emango zaie ibilgailuen aldean; gainera kontsumo txikiko argien alde egingo da, eta zuhaitz gehiago, eserlekuak eta bizikletak aparkatzeko guneak ezarriko dira. Eraikitzeko epea 9 hilabetekoa eta obrak, ustez, urriaren 1erako hasiko dira, beranduenez” esan du Aitor Kerejetak, Hondarribiko alkateak.
Matxin Artzu kaleari dagokionez, “lerrokadura aldatu egingo da kalean zehar, baina beti gutxienez bi metroko espaloia izango du zenbaki bakoitiak dauden aldean, eta hiru metroko espaloia zenbaki bikoitiak dauden aldean. Kaleko zenbait gunetan, bi aldeetan, lerroan aparkatzeko eremuak izango dira 10 metrotik 10 metrora, eta tarteetan artelatz bana ezarriko da (zuhaitza). Ibilgailuentzako bideak 3,50 eta 4,00 metro bitarte izango ditu”.
Bernat Etxepare kalean “proposatzen diren aldaketak ez dira oso handiak. Gaur egungo lerrokadura izango du, eta trafikoak bereizten dituen erdibitzaile bat ezarriko da. Erdibitzaile horren bi aldeetan erreiak ezarriko dira, gutxienez 3,50 metroko zabalera izango dutelarik. Irundik Hondarribiranzko norabidean eskuineko espaloia egina dago Kofradiaren eraikuntza berriaren alderdian, eta irizpide bera jarraituko da Miramar eraikuntzaren ertzeraino” bukatu du Kerejetak.
