Matrikula egiteko epea irekita, Ibargain eskolan
Ibargain Musika Eskolan 2011-2012 ikasturterako matrikula epea zabalik dago hilaren 30a arte (datorren ostegunera arte). Hainbat musika tresna jotzen ikasteko eskolak eskaintzen dituzte Ibargainen: akordeoia, bateria, biolina, biolontxeloa, gitarra kla...
Ibargain Musika Eskolan 2011-2012 ikasturterako matrikula epea zabalik dago hilaren 30a arte (datorren ostegunera arte).
Hainbat musika tresna jotzen ikasteko eskolak eskaintzen dituzte Ibargainen: akordeoia, bateria, biolina, biolontxeloa, gitarra klasikoa eta elektrika, harpa, klarinetea, pianoa, tronpeta eta zeharkako flauta.
Musika teoria ere lantzen dute: musika hizkuntza, harmonia, musika analisia eta kontserbatorioetan sarrera-azterketak prestatzen laguntzen dute.
Azkenik, taldeka ere musika lantzen dutela gogorarazi dute Ibargaindik: “Eskolan kamara musika lantzen dugu bikoteetan eta hirukoteetan, orkestra klasikoa dugu, bi pop-rock talde (Nau eta Hiru bi band!), biolin taldea, flauta taldea (aski ezaguna den Oiartzungo Flauta Taldea), klarinete taldea, eta hainbat instrumentu jotzailek eta mailetako musikariek osatutako beste taldeak”.
Musika eskolatik nabarmendu dute bost eta sei urtekoentzat astearteetan eta ostegunetan arratsaldez izango direla musika saioak, eta zazpi urtekoentzat eguerdian. Horiek ere astearteetan eta ostegunetan.
Haurrak eta gazteak ez ezik, gero eta ikasle heldu gehiago animatzen ari dira musika ikastera, eskolatik jakinarazi dutenez: “Bai musika hizkuntzan eta baita instrumentuetan ere”.
Haur, gazte eta heldu, guztiak animatu dituzte Ibargaindik musika ikastera.
Ikasleen oporrak
Gaur, 16:30etik 19:00ak arte pasatu behar dute Ibargain Musika Eskolako ikasleek beraien txostenen bila eta datorren ikasturterako zenbait informazioren bila. Hala, aste honetan hasiko dituzte merezitako oporrak 200 musika ikasle oiartzuarrek.
