Bihar hasiko dute San Miguel Liga Oarso Bidasoko traineruek
Bihar hasiko dute Traineru Kluben Elkartearen (TKE) San Miguel Liga, Bordelen, San Juanek, San Pedrok eta Hondarribik. Erakustaldi estropada izango da biharkoa (17:00etan), eta etzi, eremu berean, ligako lehen puntuak banatuko dituzte eguerditik aurrera. Hemeretzi estropada puntuagarri izango ditu aurten ligak. Iazkoa hobetu nahi dute Oarso Bidasoko traineruek.
Izan ere, iaz, denboraldi ona –San Miguel Liga, Kontxa eta txapelketak kontuan hartuta– egin zuten San Juan, Libia eta Ama Guadalupekoa ontziek. San Miguel Ligan, hirugarren izan ziren arrosak, zortzigarren moreak eta bederatzigarren berdeak. Hala, hirurek iazkoa hobetzea dute helburu, eta horretarako indartu dituzte taldeak. Oso zaila izango dute hori egitea, beste bederatzi taldeak ere indartsuak direlako.
Oarso Bidasoko hiru traineruetan bajak eta fitxaketak izan dira. Liga hasi aurretik egin dituzten jaitsieretan eta banderetan izan dituzten emaitzak sasoia itxaropenez hasteko modukoak dira, horrek esan nahi du koadrilak osatzerakoan asmatzen ari direla.
Hiru estropada
San Miguel Ligaren barruan bi estropada egingo dituzte Pasaian, eta beste bat Hondarribian. San Pedrok antolatuko du Pasaiako badian Pasaiako Portu Berriaren Bandera, uztailaren 23an (18:00etan). Abuztuaren 20an, berriz, Hondarribiko XXIV Ikurrina-Mapfre Saria izango dute jokoan 18:00etatik aurrera. Hurrengo egunean, abuztuaren 21ean, II. Iberdrola Bandera lehiatuko da, San Juanek antolatuta, 12:00etatik aurrera.
Estropada horiek egiten direnerako jakingo da nola dabiltzan Oarso Bidasoko hiru traineruak, eta horrenbestez, bakoitzak zeren alde borrokatuko duen garbi izango dute. Ohikoa denez, ikusgarriak izango dira Pasaian eta Hondarribian egingo diren estropada horiek.
KAE2 Liga, bihar
San Miguel Liga bezala, bihar hasiko da Kantauriko Arraun Elkarteen bigarren liga, KAE2 Liga. Asturiasen (Luancon), 17:00etan izango da estropada hori. KAE2 Ligan Oarsoaldeko hiru ordezkari izango dira: Errenteria-Oreretako Hibaika, eta Pasaiako Trintxerpe-Illunbe eta San Pedro B. KAE1 Liga eta Emakumeen Liga hilaren 25ean hasiko dira.
