Kirola bereizketarik gabe
Gurpildun aulkian egotea, itsua izatea… ez dira oztopo kirola egiteko, eta horren erakusgarri izango da igandean egingo duten kirol egokitua ezagutzera emateko jardunaldia. Egun osoan zehar kirol egokitua gertutik ezagutzeko aukera izango da, eta praktikatu ere egin ahal izango da, batik bat, goizean. Errenteria-Oreretako Niessen elkarteak beste hamar elkarterekin batera —San Huberto, Gure Toki, Bukagaitz, Euskaldarrak, Landare Elkartea, Beraun Bera, Alkartasuna, Gau Txori, Ostarte eta Txintxarri— eta Gipuzkoako Kirol Egokituaren Federazioarekin elkarlanean antolatu kirol egokituaren egun hori. Goizean goiz hasiko dira ekintzekin. Bertan batik bat txikienek hartuko dute parte, 8-16 urte arteko haurrek. Kirol eskaintza zabala aurkituko dute Koldo Mitxelena plazan: goalballa, saskibaloia gurpil autoan, slaloma, txirrindularitza egokitua, mahai tenisa, xakea eta badmintona. Ekimen horrek helburu bikoitza izango duela jakinarazi dute Niessen elkarteko kideek: “Asmoa da erakustea elbarritua den lagun bat edukitzea ez dela txarra, eta eurek ere jolas egin dezaketela. Ikusiko dute ere euren kasuan ez dela horren erraza kirola egitea”. Bigarren helburua, berriz, gurasoak kontzientziatzea izango dela azaldu dute, eta bide batez, elbarrituen gurasoei bakarrik ez daudela sentiaraztea. Goizean nahiko kirola egin ostean, bazkaltzeko tartea hartuko dute eguerdian. Parte hartuko duten elkarteen artean gastronomia lehiaketa egingo dute, eta garaikurrak ere izango dira platerrik goxoena prestatzen dutentzat. Horiekin bazkaria [...]
Gurpildun aulkian egotea, itsua izatea… ez dira oztopo kirola egiteko, eta horren erakusgarri izango da igandean egingo duten kirol egokitua ezagutzera emateko jardunaldia. Egun osoan zehar kirol egokitua gertutik ezagutzeko aukera izango da, eta praktikatu ere egin ahal izango da, batik bat, goizean.
Errenteria-Oreretako Niessen elkarteak beste hamar elkarterekin batera —San Huberto, Gure Toki, Bukagaitz, Euskaldarrak, Landare Elkartea, Beraun Bera, Alkartasuna, Gau Txori, Ostarte eta Txintxarri— eta Gipuzkoako Kirol Egokituaren Federazioarekin elkarlanean antolatu kirol egokituaren egun hori.
Goizean goiz hasiko dira ekintzekin. Bertan batik bat txikienek hartuko dute parte, 8-16 urte arteko haurrek. Kirol eskaintza zabala aurkituko dute Koldo Mitxelena plazan: goalballa, saskibaloia gurpil autoan, slaloma, txirrindularitza egokitua, mahai tenisa, xakea eta badmintona.
Ekimen horrek helburu bikoitza izango duela jakinarazi dute Niessen elkarteko kideek: “Asmoa da erakustea elbarritua den lagun bat edukitzea ez dela txarra, eta eurek ere jolas egin dezaketela. Ikusiko dute ere euren kasuan ez dela horren erraza kirola egitea”.
Bigarren helburua, berriz, gurasoak kontzientziatzea izango dela azaldu dute, eta bide batez, elbarrituen gurasoei bakarrik ez daudela sentiaraztea.
Goizean nahiko kirola egin ostean, bazkaltzeko tartea hartuko dute eguerdian. Parte hartuko duten elkarteen artean gastronomia lehiaketa egingo dute, eta garaikurrak ere izango dira platerrik goxoena prestatzen dutentzat. Horiekin bazkaria egingo dute Koldo Mitxelena plazan. 220 pertsonentzako tokia izango dela zehaztu dute Niessen elkartekoek, eta txartelak elkarteetan edo egunean bertan plazan lortu ahal izango dira 6 euroren truke.
Lehia, arratsaldean
Arratsaldean, berriz, pilota izango da nagusi Fanderiako frontoian. Bertan, hiruzpalau partidu jokatuko dituzte, palan eta pilotan, gurpildun aulkian ibiltzen diren kirolariek. Tarteetan, berriz, bertso eskolako ikasleen bertsoekin alaitzeko aukera izango dute ikus-entzuleek.
Niessen elkarteetik jakinarazi dutenez, ekimen horrekin lortu nahi dutena da aurrera begira elbarrituentzako pilota taldea osatzea eskualde mailan. Hala, EPLErekin hitz egin dutela aurreratu dute, eta pilota taldekoek ideiarekin bat egin dutela.
Jardunaldi gehiago
Kirol egokituaren jardunaldia herrian egiten duten lehengo aldia izan da, baina antolatzaileen asmoa da aurrera begira ere jarraitzea.
Jardunaldiaren berri emateaz gain, Niessen elkartetik eskerrak eman dizkiete igandeko ekimena prestatzen lagundu dieten guztiei, bai elkarteei eta baita komertzio eta erakundeei ere. Ildo horretatik, aipamen berezia egin diete Egiluze sagardotegiari, Super Amarari eta Kutxari.
Egitaraua
11:30-13:30. Jolasak Koldo Mitxelena plazan: goalballa, saskibaloia gurpil aulkian, slaloma, txirrindularitza egokitua, mahai tenisa, xakea, badmintona.
14:00-16:30. Herri bazkaria Koldo Mitxelena plazan, herriko elkarte gastronomikoen eskutik. Txartelak elkarteetan edo egunean bertan Koldo Mitxelena plazan eros daitezke 6 euroren truke.
17:00-18:30. Pilota partiduak (palakoak eta eskupilotakoak) eta bertsolariak izango dira Fanderiako pilotalekuan.
