‘Letrak elurretan’ liburua aurkeztu du Antton Kazabonek
Antton Kazabonek haurrentzako beste liburu bat kaleratu du: Letrak elurretan. Gaur aurkeztu du Donostian. Zortzi urtetik gorako haurrentzako da, Jokin Larreak egin ditu marrazkiak, eta Elkarrek argitaratu du. Hona liburuaren laburpena: “Denis ait...
Antton Kazabonek haurrentzako beste liburu bat kaleratu du: Letrak elurretan. Gaur aurkeztu du Donostian. Zortzi urtetik gorako haurrentzako da, Jokin Larreak egin ditu marrazkiak, eta Elkarrek argitaratu du.
Hona liburuaren laburpena: “Denis aitonarekin bizi da mendian, gustura asko gainera. Baina aitonak badu kezka bat: Denis ez da eskolara joaten, baserritik urruti baitago eta horregatik, oraindik ez daki ez idazten ez irakurtzen. Aitonak Edurne lehengusinari eskatu dio oporretan baserrira joan eta Denisi letrak irakurtzeko irakasteko”.
Egileak azaldu duenez, egungo haurrak ohituta daude liburuak edota ordenagailuko orriak irakurtzen, baina horiez gain, badaude jakinduriaz betetako beste orri batzuk: “Naturaren orriak dira, beste kolore batzuekin idatzita daudenak”. Horiek ere ezagutzea komeni dela uste du egileak, eta horren gainekoa da lana.
Haur eta gazte literatura
Kazabon Oiartzunen jaioa da. Lanbidez irakaslea, haurrentzako nahiz gazteentzako hainbat liburu idatzi ditu, hala nola: Olatuak loretan, Nire ahizpa aluita, Aurpegiko ubeldurak, Atearen atzean, Pirtzina zilborrean…
