Euskara normalizatzeko ahalegina merkataritzan
Euskara Biziberritzeko Plan Nagusiaren barruan, herriko zerbitzu eta establezimenduetan euskararen erabilera normalizatzeko ahalegin berria egingo du Hondarribiko Euskara Zerbitzuak. Herritarren bizitzan eragina duten bertako denda, taberna, zerbitzu e...
Euskara Biziberritzeko Plan Nagusiaren barruan, herriko zerbitzu eta establezimenduetan euskararen erabilera normalizatzeko ahalegin berria egingo du Hondarribiko Euskara Zerbitzuak. Herritarren bizitzan eragina duten bertako denda, taberna, zerbitzu eta establezimenduetan, Euskara Hondarribiko Merkataritza egitasmoak, euskararen erabilera indartzea du helburu. Horretarako, merkatari eta ostalari guztiei laguntza eskainiko diete.
Ondorengo laguntzak eskainiko dituzte: izaera desberdineko testu eta idazki komertzialen itzulpen eta diseinua, zerbitzu-establezimenduek erabil ohi duten idatzizko materiala euskaraz (fakturak, ordainagiriak…), eta merkataritza arlo desberdinetako hiztegiak. Diru laguntzak ere eskainiko dituzte egitasmoaren bitartez: euskara ikastaroetara joateko, kanpoko irudi komertziala aldatzeko, edota web orria euskaratzeko, eta baita hizkuntzako aholkularitza zerbitzua ere.
Euskara Zerbitzuaren laguntza urte osoan eskaintzen dute, baina urtean behin establezimenduak bisitatzen dituzte eta bertako arduradunei egitasmoan eskainitako zerbitzu eta laguntzak gogoratzen dizkiete. Horrela, laguntza eskaerak jasotzen dituzte eta euskararen ezagutza mailari eta ahozko nahiz idatzizko erabilera-mailari buruzko datuak biltzen dituzte, sektorearen hizkuntza egoera eta bilakaeraren inguruko informazioa izateko.
Aurten, azken urtetan ez bezala, herriko merkataritza, ostalaritza eta zerbitzu establezimendu guztiak bisitatuko dituzte. Izan ere, 2010. urtean ostalaritza sektoreko establezimenduak soilik bisitatu zituzten, eta 2009an merkataritza txikia eta zerbitzu eta establezimenduk parte hartu zuten egitasmoan.
