Pasaiako Udalak Basaburuako ikastola lagunduko du bi urtez
Pasaiako Udalak eta Basaburuako ikastolak hitzarmena sinatu zuten joan den larunbatean. Horrela, Udalak diruz laguntzearen truke zuberotarrek euren kultur eskaintza ekarriko dute herrira. 3.000 euroko laguntza emango dio, Oiartzungo eta Lezoko udalek b...
Pasaiako Udalak eta Basaburuako ikastolak hitzarmena sinatu zuten joan den larunbatean. Horrela, Udalak diruz laguntzearen truke zuberotarrek euren kultur eskaintza ekarriko dute herrira. 3.000 euroko laguntza emango dio, Oiartzungo eta Lezoko udalek bezala. Izan ere, bi udal horiek hitzarmena dute ere Zuberoako ikastolarekin.
Basaburuako ikastola Zuberoako mendialdean dagoen ikastola da eta euskarazko hezkuntza ematen du, momentu honetan alde horretan bakarra. “Estatu frantsesean diru-laguntza publikoak ikastolei emateko ez dago aukerarik momentu honetan. Bide horretatik hiru udalei laguntza eskatu digute. Guk onartu dugu eta trukean beraien kultura eskaintza hona ekartzeko eskatu diegu aurreko bi urtetan bezala”, azaldu du Iñigo Esnaola Lezoko Udaleko zinegotziak.
‘Olaz, Ola… Ikas…’ ikuskizuna
Ekainaren 18an Zazpiak Bat Eguna izango da Antxon hitzarmenaren haritik. Lezon eta Oiartzunen ere egin zituzten jaialdiak.
Horrela, Zazpiak Bat Egunerako egun osoko egitaraua prestatu dute: dantzak, Zuberoako produktuekin azoka, ipuin kontalariak, bazkaria 400 lagunentzat, kantu jira… Tartean Olaz, Ola… Ikas ikuskizuna eskainiko dute zuberotarrek.
Zuberoko ikastoletako ikasle ohiek eta gurasoek landutako ikuskizuna da Olaz, Ola… Ikas. Ikasleen ikuspuntutik Zuberoko ikastolen sorreratik gaur egun arteko ibilbidea kontatzen dute ikuskizunean, besteak beste, ikastolek zer nolako zailtasunak eta nekeak izan dituzten egoitza finkoak lortzeko. Dantzak, musikak, kantoreak eta antzerkiak bat egiten dute emanaldian.
