2011ko aurrekontuak onartu ditu Udalbatzak
Berandu, baina Errenteriako Udal Gobernu Taldeak ostiraleko ezohiko osoko bilkuran aurkeztu zituen 2011ko aurrekontuak, eta aurrera atera ziren. Udal Gobernu Taldea osatzen duten PSE-EE, EAJ eta Hamaikabatek babestu zituzten, eta PPk ere aldeko bozka eman zien. Ezker abertzaleak eta Ezker Batuak, berriz, kontrako botoa eman zuten. Udal Gobernu Taldeak “diru sarrerak eta gastuak berdintzea zaila” izan dela onartu zuen aurrekontuak aurkezterakoan. Ia 46 milioi eurora ailegatuko dira, eta ezohiko diru sarrerarik izango ez dituztela kontuan hartuta, batik bat ohiko gastuak murrizten saiatu direla nabarmendu zuen Joaquin Acosta Ogasun delegatuak. Hala ere, gastuen atalean sartu behar izan dituzte Gipuzkoako Foru Aldundiari itzuli behar dizkioten 5 milioi euroen herena. Horrez gain, inbertsio batzuei erantzuteko 1,5 milioi euroko kreditua eskatzea aurreikusi dute. Joxe Mari Burgos Hamaikabateko ordezkariak ohiko gastua murrizten saiatu direla nabarmendu zuen “diru sarreren defizitari aurre egiteko”. Ildo horretatik, 2010ean 2,4 milioi euro aurreztu dituztela jakinarazi zuen, “herritarrei eman beharreko zerbitzuan eragin gabe”. Ohiko gastua murrizten jarraitu behar da Burgosen ustez, etorkizuneko korporazioek lan egin dezaten. Lucia Peralta PPko bozeramailea pozik azaldu zen aurkeztutako zuzenketak onartu dituztelako. Hala ere, Udalaren egoera ekonomikoa txartzat jo zuen, eta Errenteria Garatuz bertan behera uztearen alde egin zuen. Gastuak murriztearen alde, zinegotziek ere “gerrikoa estutu” [...]
Berandu, baina Errenteriako Udal Gobernu Taldeak ostiraleko ezohiko osoko bilkuran aurkeztu zituen 2011ko aurrekontuak, eta aurrera atera ziren. Udal Gobernu Taldea osatzen duten PSE-EE, EAJ eta Hamaikabatek babestu zituzten, eta PPk ere aldeko bozka eman zien. Ezker abertzaleak eta Ezker Batuak, berriz, kontrako botoa eman zuten.
Udal Gobernu Taldeak “diru sarrerak eta gastuak berdintzea zaila” izan dela onartu zuen aurrekontuak aurkezterakoan. Ia 46 milioi eurora ailegatuko dira, eta ezohiko diru sarrerarik izango ez dituztela kontuan hartuta, batik bat ohiko gastuak murrizten saiatu direla nabarmendu zuen Joaquin Acosta Ogasun delegatuak. Hala ere, gastuen atalean sartu behar izan dituzte Gipuzkoako Foru Aldundiari itzuli behar dizkioten 5 milioi euroen herena. Horrez gain, inbertsio batzuei erantzuteko 1,5 milioi euroko kreditua eskatzea aurreikusi dute.
Joxe Mari Burgos Hamaikabateko ordezkariak ohiko gastua murrizten saiatu direla nabarmendu zuen “diru sarreren defizitari aurre egiteko”. Ildo horretatik, 2010ean 2,4 milioi euro aurreztu dituztela jakinarazi zuen, “herritarrei eman beharreko zerbitzuan eragin gabe”. Ohiko gastua murrizten jarraitu behar da Burgosen ustez, etorkizuneko korporazioek lan egin dezaten.
Lucia Peralta PPko bozeramailea pozik azaldu zen aurkeztutako zuzenketak onartu dituztelako. Hala ere, Udalaren egoera ekonomikoa txartzat jo zuen, eta Errenteria Garatuz bertan behera uztearen alde egin zuen. Gastuak murriztearen alde, zinegotziek ere “gerrikoa estutu” behar dutela uste du. Hala, alderdiko idazkaria edukitzeari uko egitea erabaki dutela jakinarazi zuen.
EAJko Maite Peñak ere aurrekontuak defendatu zituen, eta aurreikusita zegoen panoramari begiratuta, “hobetu daitezkeen aurrekontuak, baina onak” direla iritzi dio. Izan ere, aurtengo urtea “zaila” izango zela espero zuten, batik bat 2011an, 2012an eta 2013an aldundiari itzuli behar zaizkion 5 milioi euroengatik. Hala, garrantzitsutzat jo zuen eskatutako mailegua ez gastatzea, eta horri esker, aurreko ekitaldian “3,5 milioi euroko aurrezte positiboa” lortu dutela esan zuen.
“Garai desegokian”
Aurka bozkatu duten bi taldeek bat egin zuten esaterakoan aurrekontuak beranduegi eta garai desegokian etorri direla, eta biek iragarri zuten errekurtsoa aurkeztuko dutela.
Jose Manuel Ferradas EBko bozeramaileak gogorarazi zuen egoera ekonomikoa zaila diotela adituek, eta egoera horren aurrean, Udal Gobernu Taldeak “aurrekontu txarrak” aurkeztu dituela esan zuen, eta defizitarioak izango direla aurreikusi zuen. Ferradasen arabera, “etxea teilatutik hasi dute, oinarritik beharrean”. Oinarri hori, hain zuzen, Ekonomi eta Finantza Plana izan behar duela uste du, “eta guztien parte hartzearekin”. Proposamenari babesa eman dioten EAJ, PP eta Hamaikabati arduraz jokatzeko eskatu zien.
Ezker abertzaleak ere esan zuen ez dela momentu egokia aurrekontuak onartzeko, “ez da denbora izango aurrekontuko euro bakar bat ere kudeatzeko”, adierazi zuen Karlos Murua ezker abertzaleko bozeramaileak. Gaineratu zuen “bere momentuan” aurkeztu behar zirela, eta Ekonomia eta Finantza Plan baten ondorio izan behar zuela. Muruaren arabera, diru sarreren aurreikuspenak gehiegizkoak dira, eta azkenean herritarrei presio fiskala handituz konponduko dute arazoa.
Merinok aurrekontuak defendatu zituen, eta Udal Gobernu Taldeari botatako kritiken kontra esan zuen oposizioko taldeek kontra egiteko eskemari jarraitu ziotela. “Erakunde ugari geroz eta gehiago zorpetzen doazen honetan, Errenteriako Udalak zorra murriztu du. 2003an 24 milioi euroko zorra zuen, eta 2011an 18 milioi eurokoa”, adierazi zuen. 2010ean ere mailegua ez erabiltzea ere “albiste ona” zela esan zuen. Onartu zuen aurrekontuak berandu aurkeztu zituztela,”duela bi egun”, ordea, “kritikari gogorrena zen ez genituela aurrekontuak aurkeztu, eta orain, berriz, aurkeztu ditugula”.
Eguneko lehenengo plenoan beste bost puntu eztabaidatu zituzten, eta bertan Udalaren eta bere barneko hiru erakunderen lanpostu zerrendak eta lan taldeak onartu zituzten: Errenteria Musikal, zaharren egoitza, Udal Kirol Patronatua.
Murias Center 4ren kontuak aztertuko dituzte
Ostiralean bigarren ezohiko batzarra egin zuten, eta puntu bakarra aztertu zuten. Bertan, ezker abertzaleak Murias Center 4ren ekonomia eta finantza egoera aztertzeko talde politiko guztiek osatutako batzorde berezi bat eratzeko eskatzen zuen.
Alkateak, baina, beste proposamen bat aurkeztu zuen: Udaleko zerbitzu ekonomikoek Murias Center 4k aurkeztutako balantze ekonomikoei buruzko txosten bat egitea, eta ondoren, Ogasun batzordean aztertzea.
Azkenean alkateak egindakoa atera zen aurrera, aho batez. Proposamenari, baina, zuzenketa bat gaineratu zioten, guztia ahalik eta lasterren onartzeko. Hala, maiatzaren 2ko asterako Ogasun batzordea biltzeko konpromisoa hartu zuten.
Sabecoko langileak udalbatzarrean izan ziren, eta eskerrak eman zizkieten udal taldeei. Jakinarazi zutenez, atzo kaleratzeak sinatzekoak zirela. Horren erantzule egin zuten Murias bera eta Udala.
