«Zerbait egin behar dugu»
Martxoaren 11n Japonian izan ziren lurrikararen eta tsunamiaren ondoren etengabe izan dute buruan Oscar Iglesiasek eta Satoko Hosomik ideia bat buruan: «Zerbait egin behar dugu». Zerbait hori etzi egingo dute, Donostiako Antigua auzoko Baso Etxea elkartean, Japoniaren alde dirua biltzeko bazkaria antolatu dutelako. Iglesias eta Hosomi Pasai Antxon bizi dira, eta Donostialdean eta Oarso-Bidasoan dauden 30-40 japoniarrek eta euren bikoteek antolatu dute bazkaria.
«Inoiz ez dute Japoniako egoeraren gaineko kezka era nabarmenean azaldu. Arduratuta daude, goibel, baina beharbada jaso duten hezkuntzagatik, ez daude ohituratuta sentitzen dutena modu irekian esatera. Beraz, guk, hemen jaiotakook, bultzada eman genien eta bazkaria antolatzeko ideia izan genuen», azaldu du Oscar Iglesiasek, Satoko Hosomiren bikotekideak.
Ezbeharra izan eta berehala Japoniara deitu zuela aitortu du Hosomik. Tokion eta Osakan ditu senideak. Baina telefono lineak kolapsatuta zeuden, eta ordu batzuren buruan bakarrik lortu zuen senideekin hitz egitea: «Lurrikararen epizentrotik eta tsunamia izan zen zonaldetik urrun bizi dira nire senideak. Haiekin hitz egin nuenean ondo zeudela esan zidaten, arduraduta, baina ondo. Horrek asko lasaitu ninduen».
Baina hemen, japoniarren komunitatea maiz biltzen den arren –bazkariak, irteerak eta bestelakoak egiten dituzte–, ez zuten inoiz ere elkarrekin eta kanpora begira ezer ere antolatu.
Harrera «izugarria»
Aste batzuk dira etziko bazkaria antolatzen hasi zirela euskaldunez eta japoniarrez osatutako taldea. Ideia asko izan zituzten esku artean, baina bazkariarena iruditu zitzaien egokiena. Hala, otordua antolatzeko jo dituzten ate guztiak parez pare zabaldu dizkietela esan du Iglesiasek: «Bazkarirako edariak-eta eskatu genituen. Ezagunei batez ere. Bi kaxa ardo eskatu, eta adibidez, 70 eman dizkigute. Odon Elorza Donostiako alkateak ere oso jarrera ona agertu du gure ekimenarekin. Harrera izugarria izan da».
Realeko eta Lagun Aro GBCko kideek, adibidez, zozkatzeko kamisetak eman dizkiete; Donostia inguruko jatetxe ospetsuenetako sukaldariak ere laguntzeko prest agertu dira, eta zozkatzeko gonbidapenak eman dituzte. «Bazkarian zozkatuko ditugu horiek guztiak. Baina bazkaria baino, egun osoko jai baten traza hartzen ari da dena. Antiguako kaleak girotuko ditugu, megafoniarekin, dantzariekin eta bestelakoekin. Hori bai, telefonoa etengabe jotzen ari zait», azaldu du Oscar Iglesiasek. Hosomi ere pozik dago etziko ekimenarekin. Sentimenduak azaleratzea kosta egiten bazaie ere, zailtasunen aurrean gogorrago lan egiteko ohitura dutela azaldu du japoniarrak: «Igandean ere hala egingo dugu».
Etekinak
Bazkaritik eta ondoren egingo dituzten zozketetatik aterako duten dirua oso-osorik Japoniako ezbeharretan kaltetuta izan direnei bidaliko dietela jakinarazi du Iglesias antxotarrak. «Beharbada, baten bati gehiegitxo irudituko zaio bazkariagatik 50 euro ordaintzea, baina merezi du. Beste herrialdeetan ezbeharrak izan direnean elkartasun keinuak izan diren bezala, Japoniak ere laguntza merezi duela uste dugu», azaldu du.
Non. Donostiako Antigua auzoko Baso Etxea elkartean.
Noiz. Hilak 10, igandea.
Sarrerak. 50 euroan daude salgai Antiguako Txubillo jatetxean. 125 sarrera daude salgai, eta agortu arte salduko dituzte.
Menua. Harrera koktela; hegaluze tatakia; miso zopa; temakisushi; labean egindako arraina, japoniar erara; azpizuna yaki niku saldarekin; postrea, kafea eta kopa.
Sukaldariak. Antiguako Txubillo jatetxeko Hitoshi eta Akari sukaldariek egingo dute bazkaria. Japoniarrek zerbitzatuko dituzte mahaiak.
Bazkaria bitartean hainbat zozketa egingo dituzte. Horietan parte hartzeko txartelak salduko dituzte igandean.
Bazkaria bitartean hainbat zozketa egingo dituzte. Horietan parte hartzeko txartelak salduko dituzte igandean. 
