Bakardadearen konpainia
Bakarrik egotea, hauta daitekeenean, polita izan daiteke, pertsona bakoitzak bere buruari momentu bat eskaintzeko. Arazoa, baina, bakardadea gainera etortzen denean sortzen da, norberak nahi ez duenean, bizitzak berak bakardadea ekartzen duenean. Horren adibide izan daitezke adineko pertsonak. Zahartzaroa eta bakardadea batera datoz hainbat kasutan. Gurutze Gorriak emandako datuen arabera, 65 urtetik gorako herritarren %16 bakarrik bizi dira, eta horrek depresioa eta halako gaixotasunak eragin diezazkieke. Egoera horretaz ohartarazteko eta herritarren iritziak biltzeko, otsailean Gurutze Gorriko kideak Errenterian ibili dira, bakardadeari buruzko kanpaina batean murgilduta. Errenteria da haien probalekua, eta han egiten dituzte gero Gipuzkoa osora zabaltzen dituzten kanpainen probak. Galdetegiz galdetegi, bederatzi egunean, hasieran jarritako helburura iritsi dira: mila herritarri galdeketa egitea —1.026 izan dira—. Behin Errenteriako lana bukatuta, orain Donostiako Altza eta Larratxo auzoetara joango dira. Aste honetan 500 inguru lagunengana iritsi nahi dute. Hortik Lezora, Oiartzunera, Elgoibarrera, Soraluzera, Eibarrera eta Beasainera joango dira. Martxo amaierarako edo apiril hasierarako amaitzea espero dute. Bi eratako galdetegiak Pertsona horiei bakardadeaz eta depresioaz daukaten iritziaz, bizipenez, esperientziez eta gogoetez galdetzen diete. Horretarako, hainbat kartel erakusten dizkiete, inkestatu bakoitzaren pertzepzioan eragiteko, iritzia eman dezan. Bi taldetan banatu dituzte galdetegiak. Batzuetan, bakardadeaz galdetzen dute; besteetan, depresioaz. Bakardadeaz galdetzean, hiru kartelen artean aukeratu behar dute [...]
Bakarrik egotea, hauta daitekeenean, polita izan daiteke, pertsona bakoitzak bere buruari momentu bat eskaintzeko. Arazoa, baina, bakardadea gainera etortzen denean sortzen da, norberak nahi ez duenean, bizitzak berak bakardadea ekartzen duenean. Horren adibide izan daitezke adineko pertsonak. Zahartzaroa eta bakardadea batera datoz hainbat kasutan. Gurutze Gorriak emandako datuen arabera, 65 urtetik gorako herritarren %16 bakarrik bizi dira, eta horrek depresioa eta halako gaixotasunak eragin diezazkieke.
Egoera horretaz ohartarazteko eta herritarren iritziak biltzeko, otsailean Gurutze Gorriko kideak Errenterian ibili dira, bakardadeari buruzko kanpaina batean murgilduta. Errenteria da haien probalekua, eta han egiten dituzte gero Gipuzkoa osora zabaltzen dituzten kanpainen probak. Galdetegiz galdetegi, bederatzi egunean, hasieran jarritako helburura iritsi dira: mila herritarri galdeketa egitea —1.026 izan dira—.
Behin Errenteriako lana bukatuta, orain Donostiako Altza eta Larratxo auzoetara joango dira. Aste honetan 500 inguru lagunengana iritsi nahi dute. Hortik Lezora, Oiartzunera, Elgoibarrera, Soraluzera, Eibarrera eta Beasainera joango dira. Martxo amaierarako edo apiril hasierarako amaitzea espero dute.
Bi eratako galdetegiak
Pertsona horiei bakardadeaz eta depresioaz daukaten iritziaz, bizipenez, esperientziez eta gogoetez galdetzen diete. Horretarako, hainbat kartel erakusten dizkiete, inkestatu bakoitzaren pertzepzioan eragiteko, iritzia eman dezan.
Bi taldetan banatu dituzte galdetegiak. Batzuetan, bakardadeaz galdetzen dute; besteetan, depresioaz. Bakardadeaz galdetzean, hiru kartelen artean aukeratu behar dute elkarrizketatuek, eta lau kartelen artean, depresioari buruz galdetuz gero.
Bakardadea hobekien islatzen duen kartela banku batean bakarrik ageri den gizon heldu batena dela hautatu zuten Errenterian elkarrizketatutakoek. Hala, bakardadea gehien sufritzen dutenak adineko pertsonak direla adierazi nahi izan dutela uste dute Gurutze Gorriko kideek.
Depresioa islatzeko, berriz, aulki bat ageri den kartel bat aukeratu dute, batik bat mezuarengatik: “Ez utzi depresioak honda zaitzan. Ikusten ez banauzu ere, hemen nago”. Horrenbestez, deprimituta daudenei babesa emateko eta ingurukoak laguntzeko prest daudela adierazteko mezua islatzen duela ulertu dute Gurutze Gorrikoek.
Bakardadeaz eta depresioaz gizarteak kontzientzia hartzea da helburua. Horrez gain, datu guztiak Gurutze Gorriaren behatokira bideratuko dituzte, eta ondorio- ak 1.296 solidario eta boluntariore- kin aztertuko dituzte.
Izan ere, Komunitate Osasuna eta Atari Solidarioa Sustatzeko Proiektuaren barruan dago ba- kardadeari eta depresioari buruzko kanpaina hau. Proiektu zabal horrek parte-hartzea sustatu nahi du, gizartea hobetzeko eta balioak sustatzeko. Hala, berrikuntzaren arloan mugitzen ari dira: “Elkarri laguntzeko erak modernizatu nahi ditugu”.
