Telmo Esnalek eta Asier Altunak ‘Urteberrion Amona!’ filmatuko dute
San Pedron bizi diren Asier Altunak eta Telmo Esnalek Urteberrion Amona! komedia beltzeko filma filmatzen hasiko dira aurki, hilaren 21ean, hain zuzen. Donostian grabatuko dute. Euskaraz idatzitako komedia beltz horretan, edadeko jendearen inguruan sortzen diren deserosotasunetan oinarritutako istorioa kontatuko dute. Joxemariren (Pedro Otaegi aktorea) familia hondatzen ari dela eta, bere amaginarreba zaharra egoitza batean sartzea erabakiko du bere emazte Mirentxuri (Kontxu Odriozola) ezer esan gabe. Hori guztia aurrera eraman ahal izateko Kintxoren (Josean Bengoetxea) laguntza izango du, ustez. Miren (Nagore Aranburu) da bien alaba eta Kintxo, berriz, Mirenen senarra. Alzheimerra duen amona Maria, oso kontzientea da gertatzen ari den guztiaz. Kintxori ez dio egindakoa barkatuko eta ustekabez betetako bukaera batera eramango ditu ikus-entzuleak filmak. Montserrat Carulla kataluniarra izango da Amona Maria. Amona ez beste guztiak hirian bizi dira. Eta hiriko eszenak filmatzeko Donostia hautatu dute Esnalek eta Altunak. “Postaletako Donostian” grabatuko dituzte sekuentzia gehienak: Kontxan, portuan, Bulebarrean… Ondorioz, filmean, Donostia “oso ñoñostia” azalduko dela dio zinemagileak. Donostian hiru astez grabatu ondoren, Berako edo Etxalarko (Nafarroa) etxeren batera joango dira, barrualdeko eszenak filmatzeko asmoz. Irailerako prest Ongi bidean, zazpi aste iraungo du filmaketak. Benidormera ere (Herrialde Katalanak) joango dira pare bat egunez, zenbait eszena jasotzera. Uztailerako filma muntatua eduki nahi du [...]
San Pedron bizi diren Asier Altunak eta Telmo Esnalek Urteberrion Amona! komedia beltzeko filma filmatzen hasiko dira aurki, hilaren 21ean, hain zuzen. Donostian grabatuko dute.
Euskaraz idatzitako komedia beltz horretan, edadeko jendearen inguruan sortzen diren deserosotasunetan oinarritutako istorioa kontatuko dute. Joxemariren (Pedro Otaegi aktorea) familia hondatzen ari dela eta, bere amaginarreba zaharra egoitza batean sartzea erabakiko du bere emazte Mirentxuri (Kontxu Odriozola) ezer esan gabe. Hori guztia aurrera eraman ahal izateko Kintxoren (Josean Bengoetxea) laguntza izango du, ustez. Miren (Nagore Aranburu) da bien alaba eta Kintxo, berriz, Mirenen senarra. Alzheimerra duen amona Maria, oso kontzientea da gertatzen ari den guztiaz. Kintxori ez dio egindakoa barkatuko eta ustekabez betetako bukaera batera eramango ditu ikus-entzuleak filmak. Montserrat Carulla kataluniarra izango da Amona Maria.
Amona ez beste guztiak hirian bizi dira. Eta hiriko eszenak filmatzeko Donostia hautatu dute Esnalek eta Altunak. “Postaletako Donostian” grabatuko dituzte sekuentzia gehienak: Kontxan, portuan, Bulebarrean… Ondorioz, filmean, Donostia “oso ñoñostia” azalduko dela dio zinemagileak. Donostian hiru astez grabatu ondoren, Berako edo Etxalarko (Nafarroa) etxeren batera joango dira, barrualdeko eszenak filmatzeko asmoz.
Irailerako prest
Ongi bidean, zazpi aste iraungo du filmaketak. Benidormera ere (Herrialde Katalanak) joango dira pare bat egunez, zenbait eszena jasotzera. Uztailerako filma muntatua eduki nahi du Esnalek eta uda bukaeran jaialdietara bidaltzen hasi. Donostiako Zinemaldira aurkeztuko dute.
Esnalek eta Altunak elkarrekin egingo duten bigarren euskarazko film luzea izango da. Aurretik, 2005ean, Aupa Etxebeste! egin zuten.
