Herritar batek irabazi du Almacenes Iztietaren pintura lehiaketa
Herriko eta inguruko artisten lanentzako erakusleihoetako bat bihurtzen da urtero-urtero Almacenes Iztietak antolatzen duen margolan lehiaketa. Horri, gainera, saria batu behar zaio, eta aurten herrian geratu dira maila guztietan. Helduen atalean, Ana ...
Herriko eta inguruko artisten lanentzako erakusleihoetako bat bihurtzen da urtero-urtero Almacenes Iztietak antolatzen duen margolan lehiaketa. Horri, gainera, saria batu behar zaio, eta aurten herrian geratu dira maila guztietan.
Helduen atalean, Ana Isabel Irasuegi errenteriarra izan da garailea Goiko kalea lanarengatik. Bigarren saria atal horretan, Joaquin Arregi pasaitarrarentzako izan da Luz de atardecer margolanarengatik.
Gazteen atalean (14 urtetik 18 urtera bitartean), Enara Ponvar herritarraren lana izan da onena epaimahaiaren arabera. Hojas sobre piedras lanari esker lortu du lehen saria. Haurren atalean (10 urtetik 13 urtera arte), berriz, Aroa Tarragona errenteriarra nagusitu da Caballo lanarekin. Txikienen atalean (hamar urtetik beherakoak) Lorena Hernandezen Alegria de la orca margolanak lortu du lehenengo saria.
Hamabosgarren ekitaldi honetan antolatzaileak gustura geratu dira parte-hartzearekin eta eurek emandako mailarekin. Hala eta guztiz ere, iaz baino margolan gutxiago aurkeztu dira, guztira, 48. Iaz, berriz, 59 izan ziren. Berezitasun gisa azaldu dute aurten beste urteetan baino tamaina handiagoko lanak aurkeztu dituztela.
Aurtengo ekitaldiari agur esateko sariak banatzea baino ez da falta. Hori urtarrilaren 8an egingo dute, eguerdiko hamabietan, Iztieta auzoan duten dendan.
