Bertso paper lehiaketako sariak Lasartera eta Hendaiara
Atzoko Gabonetako bertso saioan eman zuten Lau Haizetara Euskaldunon Elkarteak, Xenpelar Bertso Eskolak eta Errenteriako Udalak antolatutako bertsopaper lehiaketen irabazleen berri: XXII. Zapirain Anaiak bertsopaper lehiaketa (Helduen Maila) Ane Labaka...
Atzoko Gabonetako bertso saioan eman zuten Lau Haizetara Euskaldunon Elkarteak, Xenpelar Bertso Eskolak eta Errenteriako Udalak antolatutako bertsopaper lehiaketen irabazleen berri: XXII. Zapirain Anaiak bertsopaper lehiaketa (Helduen Maila) Ane Labaka lasartearrak lortu zuen eta XII. Ibon Zabala bertsopaper lehiaketa (Gazteen Maila), berriz, Maddi Ane Txoperena hendaiarrak. Labakak Ametsen lengoaian bertso sortagatik 500 euro eta oroigarria eraman zituen bere herrira, eta Txoperenak, berriz, 120 euro eta oroigarria Euriaren hots amaigabea bertso sortarengatik.
Helduen Mailan, guztira, 23 lan aurkeztu dira aurtengoan. Horietatik epaimahaiari gehien gustatu zaion hurrengoa errenteriar batena izan da, Aitor Albisturrena. Bizi artean hil lanarengatik eraman du bigarren saria, 250 euro. Lehenengo akzesita, berriz, Nikolas Zendoia zarauztarrarentzako izan da, Txoriak erruki bertso sortarengatik. 120 euro eraman ditu.
Gazteen Mailan, berriz, hamasei lan aurkeztu dira. Bigarren tokian, Jone Alberdi urretxuarra geratu da Zer ote da adina! lanarekin. 90 euro poltsikoratu ditu. Ibon Zabala lehiaketako hirugarren saria eman gabe geratu da, baina lehenengo akzesitak izan du garailea: Aitor Etxetxuri-Servier azkaindarra Mugarriak: berdin elur, haize zein lanbro bertso sortarengatik.
Bai Helduen Mailan eta baita gazteenean ere, epaimahaia pertsona berek osatu dute: Patxi Petrirena, Jose Luis Zabala eta Iker Goñi. Abenduaren 15ean bildu ziren lanik onenak zeintzuk ziren erabakitzeko.
