Gabon Abesti sariketan parte hartzeko izena eman daiteke jada
Ereintza Elkarteak antolatzen duen Gabon Abesti Sariketa Probintziala egingo dute Galtzarabordako kiroldegian. Aurtengoa, LXIV. edizioa izango da eta antolakuntzatik jakinarazi dute txapelketan parte hartzeko interesa dutenek dagoeneko izena emateko aukera dutela. Interesatuek hilaren 30a baino lehenago eman beharko dute izena.
Urtero legez, aurten ere, Ereintza Elkarteak antolatzen duen Gabon Abesti Sariketa Probintziala egingo dute Galtzarabordako kiroldegian. Aurtengoa, LXIV. edizioa izango da eta antolakuntzatik jakinarazi dute txapelketan parte hartzeko interesa dutenek dagoeneko izena emateko aukera dutela. Gipuzkoako Abesbatzen federazioak, Tolosako Plaza Zaharreko lehenengo zenbakian duen duen egoitzara joan beharko da horretarako.
Astelehenetik ostiralera, 09:00etatik 14:00etara egongo da izena emateko aukera. Informazio gehiagorako, 943 53 69 73 telefono zenbakira deitu daiteke. Interesatuek hilaren 30a baino lehenago eman beharko dute izena. Gabon Abesti sariketaren oinarriak egoitzan bertan eskuratu ahalko dira.
Hiru mailatan banatuta
Aurreko urteetan bezala, Gabon Abesti sariketak hiru maila izango ditu. Alde batetik, haurren mailako txapelketa egongo da. Maila honetan, ikastoletako eta ikastetxeetako hamabost urte bitarteko haurrek izango dute parte hartzeko aukera. Bestetik, Federatuen Maila egongo da. Gipuzkoako Abesbatzen Elkarteko gazteen eta helduen koroek hartuko dute parte maila horretan. Azkenik, Maila Herrikoia egongo da. Lagun taldeek, kudrilek, eliza abesbatzek eta hirugarren adineko koroek parte hartu ahal izango dute maila horretan.
Ereintzatik jakinarazi dute parte-hartzaile kopurua mugatua izango dela eta onarpena izen emate ordenaren araberakoa izango dela. Haurren Mailan bederatzi talde onartuko dituzte, Federatuen Mailan hiru talde eta Maila Herrikoian, berriz, zazpi.
Sari potoloak eskuragarri
Gabon Abesti Sariketan sari mordoak banatuko dituzte urtero legez. Haurren Mailan, Urrezko, zilarrezko eta brontzezko sariak banatuko dituzte. Dena den, talde guztiek izango dute saria. Federatuen Mailan sari bakarra banatuko dute. Lehenengo sailkatuak bakarrik jasoko du saria. Epaimahaiak aukeratzen duen talde onenak, 500 euroko saria jasoko du. Azkenik, Maila Herrikoieko lehenengo lau sailkatuek, 450, 350, 300 eta 250 euroko sariak jasoko dituzte. Maila horretako gainontzeko parte-hartzaileek dieta bana jasoko dute Gabon Abesti Sariketan aritzeagatik.
