Ekarpenen %80 onartu dituzte Jaizkibel-Uliaren txostenerako
Jaizkibel-Ulia Bereziki Zaindu Beharreko Eremuari buruzko parte-hartze prozesuaren azken jardunaldia egin zuten atzo Gezala Auditoriumean. Aurreko bileretan ekarpenak egin zituzten eta asteazkenean horiek aurkezteko txanda izan zen. Bilerak ordu eta er...
Jaizkibel-Ulia Bereziki Zaindu Beharreko Eremuari buruzko parte-hartze prozesuaren azken jardunaldia egin zuten atzo Gezala Auditoriumean. Aurreko bileretan ekarpenak egin zituzten eta asteazkenean horiek aurkezteko txanda izan zen. Bilerak ordu eta erdi iraungo zuela aurreikusi bazuten ere, luzexeagoa izan zen.
Aurreko bilera horietan egindako parte hartu zutenetako jende asko izan ziren atzoko bileran. Hauek izan ziren bertan, besteak beste: Pasaiako eta Lezoko udaletako ordezkariak (Maider Ziganda alkatea eta Jon Legorburu Hirigintza zinegotzia, hurrenez hurren), Euskadiko Mendi Federazioko kideak, talde ekologistetakoak, ehiztarien ordezkari bat, Biologoen Elkartea… Horrela, aurreko bileretan egin zituzten ekarpenetatik zeintzuk sartu dituzten eta zeintzuk ez azaldu zituzten Eusko Jaurlaritzako Ingurumen Saileko teknikariek.
Horrela, parte-hartzaileen ekarpenen %80 onartu dutela jakinarazi dute Jaurlaritzako teknikariek. Gainontzeko %20etatik hainbat ekarpen “erabaki politikoak” direla esan zuten teknikariek, nahiz eta eurek “beste gauza batzuk esan”.
Egin duten dokumentua abenduan edo urtarrilean jarriko dute jendaurrean. Orduan helegiteak egiteko aukera izango dute bai parte-harte prozesuan izan direnek baita gainontzeko herritarrek ere.
Eusko Jaurlaritzako teknikariek zein aholkularitzako teknikariek (dokumentua idatzi zutenek) jendearen parte-hartzea eskertu zuten, “dokumentua asko aberastu dutelako euren ekarpenen bitartez”.
