[Galeria] 13. Hondarribia Blues. Larunbateko argazkiak

Gaur bukatuko da jaialdia, Karmen Egunarekin, baina gauza asko gertatu behar dira 2018ko ekitaldiaren pertsiana jaitsi arte.

Asier Perez-Karkamo

Hondarribia

2018/07/15

Kimberly ‘Hot sauce’ Johnson, Chicago All Stars taldearen emanaldian

Luze, oso luze joan zen Hondarribia Blues jaialdiko 13. ekitaldiko hirugarren jardunaldia. Bazkalordutik hasita eta goizaldera arte, blues musika izan zen protagonista Hondarribiko Portuan nahiz Alde Zaharrean. Ghost Number And His Tipsy Gypsies taldeak ireki zuen Bentako oholtza nagusiko gaueko egitaraua. Oso ondo donostiarrak, lehen momentutik publikoa dantzan jarriz. Chicagoko izarren bilera izan zen atzoko kartel burua. Jaialdiaren aurreko edizioetan bisitatu izan gaituzten izarrek osatu zuten Chicago All Stars taldea, Hondarribira etortzeko propio elkartu direnak: Jimmy Burns eta Billy Flynn gitarretan, Bob Stroger baxuan, Kenny Smith baterian, Piano Willie pianoan, Omar Coleman harmonikan, eta Coleman bera eta Kimberly Johnson ahotsetan. Gaualdi itzela eskaini zuten, Hondarribira gustura etortzen direla erakutsiz. Hirugarren jardunaldia bukatzeko, Ray Gelatok eta bere erraldoiek mambo doinuez zipriztindu zuten Kai Zaharra ingurua. Ez litzateke harritzekoa bat baino gehiago giharretako minarekin esnatzea gaur. Gaur bukatuko da jaialdia, Karmen Egunarekin, baina gauza asko gertatu behar dira pertsiana jaitsi arte.