Zinema euskaraz, dibertitzeko eta emozionatzeko
Igandean Amama film luzea proiektatuko dute Itsas Etxean, 20:00etan. Egun bat lehenago Pan abenturazko superprodukzioa, 18:00etan.
Ondo pasatzeko, emozionatzeko, pentsa arazteko balio du zinemak, besteak beste. Eta hori da asteburuan Hondarribian dagoen aukera, euskarazko zinemarekin dibertitzea, eta hunkitzea. Euskarazko bi film luze proiektatuko dituzte Itsas Etxea Auditoriumean, bat larunbatean eta bestea igandean, familientzako abenturazko pelikula bat, eta helduentzako drama zirraragarri bat, Pan eta Amama.
Peter Pan pertsonai ezagunaren abenturak kontatzen ditu Pan filmak. Superprodukzioa da eta hainbat aktore ezagunen parte hartzea izan du, hala nola, Hugh Jackman, Rooney Mara, Amanda Seyfried edo Adeel Akhtar, besteren artean.
Peter Panen abenturak bai, baina Peter Pan gaztetxoarena. 12 urteko mutiko bihurria da Peter, eta Londresko umezurtz-etxe batean bizi da. Gau batez, Sekula Betirako mundura bidaia egingo du, eta bertan pirata, gerlari eta maitagarriekin abentura ikaragarriak biziko ditu.
Eta Amama filmari buruz, zer idatzi dagoeneko esan ez dena? Asier Altunaren azken lana Zinemaldian estreinatu zuten eta txalo zaparrada jaso zuen aurkezpenean. Baserri giroan girotutako drama da, belaunaldien arteko haustura erreproduzitzen duena. Oso Euskal Herrikoa den gaia lantzen du, baina era berean, mundu osokoa ere badena.
‘Amama’ filmeko fotograma bat
