Langile guztiak kaleratu dituztela salatu du EH Bilduk, eta langileen nahiz aterpetxearen etorkizunaren gainean dagoen zehazgabetasuna kritikatu ditu.
![Martindozenea aterpetxea](http://bidasoa.hitza.eus/site/files/2015/10/Martindozenea.jpg)
Martindozenea aterpetxea
Martindozenea aterpetxea behin-behinean itxi dutela salatu du EH Bilduk, eta egoera horrekin “sumindu eta haserretuta” dagoela adierazi du.
Hasteko, langileen egoera salatu du EH Bilduk Guztiak kaleratu dituztela esan du, eta era berean, ezjakitun direla euren etorkizunaz, “ez baitakite lanean hasiko diren ala ez, eta baiezko kasuan, noiz bueltatuko diren”. Gainera, erreserba ugari zeuden garaian bota dituztela kalera gaineratu du, eta erreserba horiek ezeztatu egin dituztela.
Udalak gai honekin izan duen kudeaketa “lardaskeria kateaketa hutsa” izan dela ere kritikatu EH Bilduk, eta ez diotela ez langileei ezta oposizioko taldeei ere inongo momentutan informaziorik eman. Jasotako informazio “urria” langileek emandakoa izan dela azaldu du.
“Zehazgabetasuna”
Oro har, Martindozenearen erabilpenaren gainean dagoen “zehazgabetasuna” salatu du udal taldeak. Izan ere, aterpetxean Siriako errefuxiatuak hartzeko prest azaldu baitzen udala. Dagoeneko bildu da EH Bilduko udal taldea Josune Gomenez arlo horren delegatuarekin (EAJ), eta berak aurreratu zien instalazioak berriro irekitzeko asmoa dutela, “datorren urteko uneren batean”.
Zentzu horretan bi erabilerak nola uztartuko dituen galdetu du EH Bilduk, baita errefuxiatuak noiz etorriko diren, eta 2016a baino lehen etortzen badira nork emango dien zerbitzua langilerik ez dagoela kontuan hartuta.